స‌రైన హిట్ లేక‌పోవ‌డంతో డాన్సింగ్ క్వీన్ శ్రీ‌లీల కెరీర్ ఈమ‌ధ్య కొంచెం డౌన్ అయింద‌న‌డంలో ఎటువంటి సందేహం లేదు. ఇలాంటి స‌మ‌యంలో పుష్ప 2 ఆమెకు మంచి కిక్ ఇచ్చింది. ఈ పాన్ ఇండియా చిత్రంలో `కిస్సిక్` అంటూ స్పెష‌ల్ సాంగ్ చేసి స్పెష‌ల్ అట్రాక్ష‌న్ గా మారింది. ఇటీవ‌ల చెన్నై వేదిక‌గా జ‌రిగిన పుష్ప 2 ప్ర‌మోష‌న‌ల్ ఈవెంట్ లో సంద‌డి చేసి త‌మిళ ద‌ర్శ‌క‌నిర్మాత‌ల దృష్టిలో ప‌డింది. ఫ‌లితంగా కోలీవుడ్ లో శ్రీ‌లీల జాక్ పాట్ ఆఫ‌ర్ అందుకుంది.
బ్యాక్ టు బ్యాక్ విజ‌యాల‌తో కోలీవుడ్ టాప్ హీరోల చెంత చేరిన మోస్ట్ టాలెంటెడ్ హీరో శివ కార్తికేయ‌న్ కు జోడిగా న‌టించే అవ‌కాశాన్ని శ్రీ‌లీల ద‌క్కించుకుంద‌ట. శివ కార్తికేయ‌న్ ఇటీవ‌లె అమ‌ర‌న్ మూవీతో ప్రేక్ష‌కుల‌ను ప‌ల‌క‌రించారు. సౌత్ తో ఈ సినిమా ఎంత పెద్ద హిట్ అయిందో ప్ర‌త్యేకంగా చెప్ప‌క్క‌ర్లేదు. ప్ర‌స్తుతం శివ కార్తికేయ‌న్ తో సినిమాలు చేసేందుకు ద‌ర్శ‌క‌నిర్మాత‌లు క్యూ క‌ట్టాయి.
ఆ జాబితాలో ఏఆర్ ముర‌గ‌దాస్‌, నెల్స‌న్‌, సీబీ చ‌క్ర‌వ‌ర్తి వంటి ద‌ర్శ‌కులు ఉన్నారు. అలాగే లేడీ డైరెక్ట‌ర్ సుధా కొంగ‌ర‌తో ఓ సినిమా చేసేందుకు శివ కార్తికేయ‌న్ క‌మిట్ అయ్యాడు. పీరియాడిక్ డ్రామాగా తెర‌కెక్క‌నున్న ఈ చిత్రానికి పుర‌నానూరు అనే టైటిల్ ను ఫిక్స్ చేశారు. జివి ప్రకాష్ కుమార్ సంగీతం అందిస్తున్నారు. సూర్య చేయాల్సిన ఈ ప్రాజెక్ట్ అనుకోని కార‌ణాల వ‌ల్ల శివ కార్తికేయ‌న్ చేతికి వెళ్లింది. అయితే ఈ సినిమాలో హీరోయిన్ గా శ్రీ‌లీల‌ను ఎంపిక చేశార‌ట. ఆల్మోస్ట్ సంప్ర‌దింపులు కూడా పూర్తి అయ్యాయ‌ని కోలీవుడ్ లో టాక్ న‌డుస్తోంది. ఇదే నిజ‌మైతే శ్రీ‌లీల ద‌శ తిరిగిన‌ట్లే అవుతుంది.
