దర్శకధీరుడు రాజమౌళి తెరకెక్కించిన ఆర్ఆర్ఆర్ చిత్రం ప్రపంచవ్యాప్తంగా ప్రశంసలు అందుకున్న సంగతి తెలిసిందే. రాజమౌళి దర్శకత్వ ప్రతిభకు జూనియర్ ఎన్టీఆర్, రామ్ చరణ్ ల అద్భుతమైన నటన తోడవడంతో ఈ చిత్రం అంతర్జాతీయ స్థాయిలో గుర్తింపు తెచ్చుకుంది. ఈ క్రమంలోనే ఈ చిత్రంలోని నాటు నాటు పాట ఆస్కార్ బరిలో నిలిచింది. అయితే, అంతర్జాతీయ స్థాయిలో తీవ్రమైన పోటీని ఎదుర్కొని ఈ పాట ఆస్కార్ అవార్డును దక్కించుకుంటుందా అని కొందరు అనుకుంటుండగా మెజార్టీ భారతీయులంతా ఈ పాటకు ఆస్కార్ దక్కుతుందని గట్టి నమ్మకంతో ఉన్నారు.
ఈ నేపథ్యంలోనే ఈరోజు జరిగిన ఆస్కార్ అవార్డుల ప్రధానోత్సవంలో కోట్లాదిమంది భారతీయుల ఆకాంక్షను నెరవేరుస్తూ నాటు నాటు పాట ఆస్కార్ అవార్డును దక్కించుకుంది. ఈ ఘనత సాధించిన తొలి తెలుగు పాటగా నాటు నాటు చరిత్ర పుటల్లో నిలిచింది. హాలీవుడ్ దర్శక దిగ్గజాలనుంచి ప్రశంసలు అందుకున్న ఈ పాట 95వ అకాడమీ అవార్డులో బెస్ట్ ఒరిజినల్ సాంగ్ కేటగిరీలో అవార్డును దక్కించుకుంది. ఈ పాటకు ఆస్కార్ అవార్డు ప్రకటించగానే ఒక్కసారిగా థియేటర్ అంతా ఈలలు, చప్పట్లతో దద్దరిల్లిపోయింది.
The team supporting #RRR goes wild as "Naatu Naatu" wins best song at the #Oscars pic.twitter.com/mgiNfkj8db
— The Hollywood Reporter (@THR) March 13, 2023
ఇక, ఈ పాటకు ఆస్కార్ వస్తుందన్న నమ్మకంతో ఈరోజు తెల్లవారుజామునుంచే టీవీ సెట్ల ముందు అతుక్కుపోయిన యావత్ భారతీయులందరూ తీవ్ర భావోద్వేగానికి లోనయ్యారు. నాటు నాటుకు ఆస్కార్ దక్కడంతో వారంతా చిందులేస్తున్నారు. ఇక, తెలుగు సినిమా పాట ఆస్కార్ కు నామినేట్ కావడం.. అవార్డు దక్కించుకోవడం ఇదే తొలిసారి కావడం విశేషం. ప్రపంచవ్యాప్తంగా తెలుగోడి సత్తా చాటిన ఈ పాటను చూసి ప్రపంచం నలుమూలలా ఉన్న తెలుగువారంతా గర్వంతో, ఆనందంతో పొంగిపోతున్నారు.
ఇక, ఇరు తెలుగు రాష్ట్రాలలో అయితే రాజమౌళి, తారక్, చరణ్ అభిమానులు పటాసులు పేలుస్తూ స్వీట్లు పంచుకుంటూ తమ ఆనందాన్ని వ్యక్తం చేస్తున్నారు. ఇక, ఆర్ఆర్ఆర్ చిత్ర బంధానికి టాలీవుడ్ మొదలు హాలీవుడ్ వరకు యావత్ ప్రపంచ సినీ పరిశ్రమకు చెందిన..ముఖ్యంగా భారతీయ సినీ పరిశ్రమకు చెందిన పలువురు శుభాకాంక్షలు తెలుపుతూ సోషల్ మీడియాను హోరెత్తిస్తున్నారు. ప్రస్తుతం నాటు నాటు పాట ట్రెండింగ్ లో ఉంది.
