నందమూరి నటసింహం, మాస్ కా బాప్ నందమూరి బాలకృష్ణ ‘అఖండ’ చిత్రం తర్వాత వరుస సినిమాలను పట్టాలెక్కించిన సంగతి తెలిసిందే. ‘అఖండ’తో ఇండస్ట్రీకి ఊపిరి పోసిన బాలయ్య…యువ స్టార్ హీరోలకు దీటుగా యంగ్ డైరెక్టర్లకు అవకాశాలిచ్చారు. ఈ క్రమంలోనే మాస్ డైరెక్టర్ గా మంచి పేరున్న గోపీచంద్ మలినేని, మాస్ కా బాప్ బాలయ్యల కాంబోలో రాబోతోన్న ‘వీర సింహా రెడ్డి’ చిత్రంపై విపరీతమైన క్రేజ్ ఏర్పడింది.
ఆ క్రేజ్ కు తగ్గట్టుగానే ఈ చిత్రం నుంచి వచ్చిన ప్రతి అప్డేట్ వైరల్ అయింది. రాయలసీమ ఫ్యాక్షన్ నేపథ్యంలో కొనసాగే ఈ సినిమాను సంక్రాంతికి భారీ స్థాయిలో విడుదల చేయబోతున్నారు. రిలీజ్ డేట్ దగ్గరపడుతున్న నేపథ్యంలో చిత్ర యూనిట్ ప్రమోషన్ల జోరు పెంచింది. నూతన సంవత్సర వేడుకలను పురస్కరించుకుని తాజాగా ఈ చిత్ర మేకింగ్ వీడియోను చిత్ర యూనిట్ రిలీజ్ చేసింది. ఈ సినిమా మేకింగ్ వీడియోను వదిలారు.
యాక్షన్ సన్నివేశాలను, ఎమోషన్ సన్నివేశాలను గోపీచంద్ మలినేని అద్భుతంగా తెరకెక్కించారని ఆ వీడియో చూస్తే అర్థమవుతోంది. ఇక, ఆ సన్నివేశాల్లో తాను తప్ప మరెవ్వరూ నటించలేరన్నట్లుగా బాలయ్య బాబు పవర్ ఫుల్ పాత్రలో ఒదిగిపోయిన వైనం కచ్చితంగా నందమూరి అభిమానులకు గూస్ బంప్స్ తెప్పిస్తోంది. ఇక, శృతి హాసన్ తో పాటల చిత్రీకరణ సందర్భంగా తీసిన మేకింగ్ వీడియో కూడా ఆకట్టుకుంటోంది.
తన తండ్రి బాలయ్య సినిమా షూటింగ్ చూసేందుకు నారా బ్రాహ్మణితో పాటు ఇతర కుటుంబ సభ్యులు కూడా రావడం ఈ మేకింగ్ వీడియోలో కనిపిస్తోంది. సంక్రాంతి పండుగ సందర్భంగా జనవరి 12వ తేదీన విడుదలవుతున్న ఈ సినిమా కచ్చితంగా బ్లాక్ బస్టర్ హిట్ అవుతుందనేలా ఈ మేకింగ్ వీడియో ఉంది.
