టాలీవుడ్ నటి ప్రగతి గురించి తెలుగు ప్రేక్షకులకు పరిచయం అక్కర్లేదు. హీరోయిన్ గా కెరీర్ ని మొదలు పట్టిన ప్రగతి ఆ తర్వాత క్యారెక్టర్ ఆర్టిస్ట్ గా బిజీ అయిపోయారు. అక్క, తల్లి, అత్త పాత్రలతో తెలుగు ప్రేక్షకులను ప్రగతి ఆకట్టుకుంటున్నారు. ఇక సోషల్ మీడియాలో విపరీతంగా యాక్టివ్ గా ఉండే ప్రగతి ఆంటీకి యూత్ లో మంచి ఫాలోయింగ్ ఉంది. ముఖ్యంగా 50 ఏళ్ల వయసులోనూ జిమ్ లో తీవ్రంగా కష్టపడుతున్న ప్రగతి వీడియోలు యూత్ ను విపరీతంగా ఆకట్టుకుంటున్నాయి.
జిమ్ లో వర్కవుట్ చేస్తున్న వీడియోలను తన సోషల్ మీడియా ఖాతాలో ప్రగతి షేర్ చేస్తుండడంతో ఆ వీడియోలు వైరల్ గా మారుతూ ఉంటాయి. ఈ నేపథ్యంలోనే తాజాగా అభిమానుల కోరిక మేరకు ప్రగతి మై హోమ్ టూర్ వీడియోను షూట్ చేశారు. తన యూట్యూబ్ ఛానెల్ లో ఆ వీడియోను ప్రగతి షేర్ చేశారు. సుమారు 30 నిమిషాల నిడివి ఉన్న ఆ వీడియో ఇప్పుడు సోషల్ మీడియాలో వైరల్ గా మారింది. తను ఎంతో కష్టపడి నిర్మించుకున్న తన బొమ్మరిల్లుకు సంబంధించిన ప్రతి చిన్న విషయాన్ని ఆ వీడియోలో ప్రగతి పంచుకున్నారు.
ఇది కోట్లు పెట్టి కొన్న ఇల్లు కాదని, తన స్థోమతకు తగ్గట్టుగా కొని అందంగా అమర్చుకున్న బొమ్మరిల్లు అని ప్రగతి చెప్పారు. పాతికేళ్లుగా ప్రతి రూపాయి కూడబెట్టి ఎంతో కష్టపడి కొన్న వస్తువులన్నీ ఈ ఇంట్లో అమర్చానని ప్రగతి చెప్పారు. తన సొంత ఇంటి కోసం పదహారేళ్ల క్రితమే ఒక నేమ్ ప్లేట్ కొని పెట్టానని, అది కొన్న పదేళ్ల తర్వాత ఈ ఇల్లు కొన్నానని ప్రగతి చెప్పారు. ఇక ఇంటి మెయిన్ డోర్ కు ఓ చరిత్ర ఉందని, తన కొడుకు తాళం మర్చిపోతే ఆ తలుపు పగలగొట్టామని అన్నారు.
అందుకే దానికి పెయింట్ వేసి ఆ తలుపును అలాగే ఉంచానని, ఆ తప్పు ఎప్పటికీ గుర్తుండాలని అలా చేశానని అన్నారు. తన ఇంట్లో ఎక్కువగా సంగీతానికి సంబంధించిన బొమ్మలు, బుద్ధుడి ప్రతిమలు ఉంటాయని, సూర్యుడు అంటే కూడా తనకు ఎంతో ఇష్టమని ప్రగతి చెప్పారు. అందుకే తన భుజంపై కూడా సూర్యుడి టాటూ ఉంటుందని అన్నారు. ఏది ఏమైనా ప్రగతి మై హోమ్ టూర్ వీడియో ప్రస్తుతం సోషల్ మీడియాలో వైరల్ గా మారింది.
