తమిళ స్టార్ హీరో సూర్య ఇటీవల నటించిన ‘జై భీమ్’ చిత్రం ఇటు ప్రేక్షకులతో పాటు విమర్శకుల ప్రశంసలనూ అందుకున్న సంగతి తెలిసిందే. అణగారిన వర్గాలను న్యాయం అందించే లాయర్ చంద్రు పాత్రలో సూర్య అద్భుతంగా నటించాడని దేశవ్యాప్తంగా ప్రశంసలు దక్కాయి. ఆకాశం నీ హద్దురా, జై భీమ్ వంటి వరుస హిట్లతో దూసుకుపోతున్న సూర్య…తాజాగా ‘ఈటీ'(ఎవరికీ తలవంచడు) సినిమాతో ప్రేక్షకుల ముందుకు రాబోతున్నాడు.
పాన్ ఇండియా రేంజ్ లో తెలుగు, తమిళ, హిందీ, కన్నడ, మలయాళ భాషల్లో విడుదల కాబోతోన్న ఈ చిత్రంపై భారీ అంచనాలున్నాయి. ఆ అంచనాలకు తగ్గట్టుగానే తాజాగా విడుదలైన ఈ చిత్రం ట్రైలర్ యూట్యూబ్ లో ట్రెండ్ అవుతోంది. అమ్మాయిలంటే బలహీనులని…అమ్మాయిలు నచ్చితే లైక్, కామెంట్, షేర్ చేయాలని విలన్ చెప్పే డైలాగ్ ఆకట్టుకుంది. అయితే, అమ్మాయింటే బలహీనులు కాదని,…బలవంతులని నిరూపించాలంటూ యువతుల్లో ధైర్యం నింపుతూ సూర్య చెప్పే డైలాగ్ ట్రైలర్ కే హైలైట్.
అల్లరి చిల్లర గా తిరిగే ఒక యువకుడు.. మహిళలపై జరుగుతున్న దాడులను, దారుణాలను, అన్యాయాలను ఆపడానికి తనవంతు ప్రయత్నం చేసే నేపథ్యంలో ఈ చిత్రం సాగుతుందని ట్రైలర్ ను బట్టి అర్థమవుతోంది. ఈ యాక్షన్ ప్యాక్డ్ మాస్ ఫ్యామిలీ ఎంటర్టైనర్ లో సూర్య ఎప్పటిలాగే తన మార్క్ నటనతో ఇరగదీశాడు. ఇక, సూర్యకు ప్రతినాయకుడిగా డిటెక్టివ్ చిత్రంలో విలన్ గా నటించిన వినయ్ రాయ్ కనిపించబోతున్నాడు. సూర్య సరసన ప్రియాంక అరుల్ మోహన్ హీరోయిన్ గా నటించింది. ఇక ఈ సినిమా ప్రపంచవ్యాప్తంగా మార్చి10 న రిలీజ్ కానుంది. సన్ పిక్చర్స్ పతాకంపై పాండిరాజ్ తెరకెక్కించిన ఈ సినిమాతో సూర్య మరో హిట్ కొట్టడం ఖాయమని ఫ్యాన్స్ అంటున్నారు.
