మెగా స్టార్ చిరంజీవి, స్టార్ డైరెక్టర్ కొరటాల శివల కాంబోలో రాబోతోన్న ‘ఆచార్య’ చిత్రంపై టాలీవుడ్ లో భారీ అంచనాలున్నాయి. సెకండ్ ఇన్నింగ్స్ మొదలుబెట్టిన చిరు వరుస హిట్లతో దూసుకుపోతున్నాడు. సందేశాత్మక చిత్రాలతో కమర్షియల్ హిట్ లు కొట్టడంలో ఆరితేరిన కొరటాల, చిరుల కాంబోలో మరో హిట్ రాబోతోందని చిరు ఫ్యాన్స్ ఎదురుచూస్తున్నారు. ఈ క్రమంలోనే ఇప్పటికే ఈ చిత్రం నుంచి విడుదలైన లాహె లాహె పాట కోసం చిరు అదిరిపోయే స్టెప్పులు వేశాడు.
ఈ నేపథ్యంలోనే ‘ఆచార్య’ ఫస్టు సింగిల్ లాహె లాహె…తోనే ఒక అరుదైన రికార్డును దక్కించుకున్నాడు. చిరు ఎనర్జిటిక్ స్టెప్పులు వేసిన ఈ పాట 100 మిలియన్ వ్యూస్ మార్క్ ను క్రాస్ చేసి సరికొత్త రికార్డును క్రియేట్ చేసింది. రామజోగయ్య శాస్త్రి సాహిత్యాన్ని అందించిన ఈ పాటకు దినేష్ అందించిన కొరియోగ్రఫీ తోడవడం…ఆ ఇద్దరికీ తగ్గట్టు చిరు స్టెప్పులు వేయడంతో ఈ పాట ఓ రేంజ్ లో హిట్ అయింది. దీంతో, తమ బాస్ ఆరు పదుల వయసులో కూడా కుర్ర హీరోలతో పోటీపడి స్టెప్పులేస్తున్నాడని చిరు ఫ్యాన్స్ సంబరపడిపోతున్నారు.
వాస్తవానికి, పదేళ్ల గ్యాప్‌ తర్వాత తెరపై కనిపించిన చిరు… తన క్రేజ్‌, డ్యాన్స్‌లో గ్రేస్‌, స్టెప్పుల్లో ఊపు తగ్గలేదని నిరూపించాడు. ‘ఖైదీ నం.150’లో అమ్మడూ లెట్స్ డూ కుమ్ముడూ….అంటూ కాజల్ తో కలిసి చిరు వేసిన చిందులు ట్రెండ్ అయ్యాయి. ఆ పాటకు చిరుతో స్టెప్పులు వేయించిన శేఖర్ మాస్టర్…ఆచార్య సినిమాలో అమ్మడూ తరహాలో మరో మాస్ నంబర్ కు కొరియోగ్రాఫీ చేశాడట. ఆ పాట చూస్తే మరోసారి చిరు ఫ్యాన్స్ కు పూనకాలు వస్తాయని అంటున్నారు.
ఇక, తాజాగా ముచ్చటగా చిరు, శేఖర్ మాస్టర్ ల కాంబోలో ముచ్చటగా మూడో పాట రాబోతోంది. మెహర్‌ రమేష్‌ దర్శకత్వంలో చిరు హీరోగా తెరకెక్కుతోన్న ‘భోళా శంకర్‌’ చిత్రంలోనూ ఈ కాంబోలో ఓ పాట రాబోతోందట. ఆ చిత్రానికి సంబంధించిన ఫొటోను శేఖర్ మాస్టర్ తన ఇన్‌స్టాగ్రామ్‌ ఖాతాలో షేర్ చేశారు. ప్రస్తుతం ఈ ఫొటో సోషల్‌ మీడియాలో వైరల్‌ అవుతోంది. శేఖర్ మాస్టర్ కొరియోగ్రఫీలో చిరు పాట కచ్చితంగా హ్యాట్రిక్‌ కొడుతుందని చిరు ఫ్యాన్స్ కాన్ఫిడెంట్ గా కామెంట్లు పెడుతున్నారు.
