నటుడు పృథ్వీరాజ్‌ అన్నంతనే గుర్తు పట్టకపోవచ్చు కానీ.. థర్టీ ఇయర్స్ ఇండస్ట్రీ అన్నంతనే తెలుగు ప్రజలకు గుర్తుకు వచ్చేస్తారు నటుడు పృథ్వీరాజ్‌. తాజాగా ఆయన మరోసారి వార్తల్లోకి వచ్చారు. ఆ మధ్యన టీటీడీ భక్తి చానల్ కీలక పదవిని చేపట్టి.. వివాదం నేపథ్యంలో రాజీనామా చేయటం తెలిసిందే. తర్వాత ఆయన కరోనా బారిన పడ్డారు. వైద్యం అనంతరం కోలుకున్నారు.
ఇదిలా ఉండగా తాజాగా తాను రోడ్డు ప్రమాదానికి గురైనట్లుగా పేర్కొన్నారు. దీనికి సంబంధించిన ఒక పోస్టును సోషల్ మీడియాలో పెట్టారు. బంజారాహిల్స్ క్యాన్సర్ ఆసుపత్రి వద్ద వినాయకుడి గుడి వైపు వెళుతున్న ఒక కారు తన కారును ఢీ కొట్టినట్లుగా వెల్లడించారు. ఈ ప్రమాదంలో తన కారు డ్యామేజ్ అయినట్లుగా చూపే ఫోటోను పోస్టు చేశారు. ‘‘కారు ధ్వంసమైంది.. చుట్టుపక్కల జనాలు గుమిగూడారు’’ అంటూ పేర్కొన్నారు.
అయితే.. తన కారు డ్యామేజ్ గురించి చెప్పిన ఆయన.. తనకు ఏమైనా గాయాలు అయ్యాయా? తన ఆరోగ్య పరిస్థితి మీద మాత్రం క్లారిటీ ఇవ్వలేదు. దీంతో.. కొత్త కన్ఫ్యూజన్ చోటు చేసుకుంది. పోస్టు పెట్టేటప్పుడే కాస్తంత క్లారిటీ ఇచ్చేస్తే సరిపోతుంది కదా?
