భద్రాద్రి కొత్తగూడెం జిల్లాలోని పాల్వంచకు చెందిన నాగ రామకృష్ణ అనే వ్యక్తి కుటుంబంతో సహా ఆత్మహత్యకు పాల్పడిన ఘటన తెలంగాణ రాజకీయాలను కుదిపేస్తోన్న సంగతి తెలిసిందే. తన చావుకు కొత్తగూడెం ఎమ్మెల్యే వనమా వెంకటేశ్వరావు కుమారుడు వనమా రాఘవ కారణమంటూ రామకృష్ణ సూసైడ్ సెల్ఫీ వీడియో వైరల్ అయింది. దీంతో, రాఘవను అరెస్టు చేయాలంటూ విపక్ష నేతలు డిమాండ్ చేస్తున్నారు.
ఈ క్రమంలోనే ఆ ఘటనపై వనమా వెంకటేశ్వరరావు స్పందించారు. కొడుకు నిర్వాకంపై వనమా వెంకటేశ్వరరావు బహిరంగ లేఖ విడుదల చేశారు.
రామకృష్ణ కుటుంబం ఆత్మహత్య తనను దిగ్భ్రాంతికి గురిచేసిందని వనమా అన్నారు. ఈ ఘటనలో తన కుమారుడిపై ఆరోపణలు రావడం కలిచివేసిందని, కానీ, పోలీసులు ఎప్పుడు పిలిచినా తన కొడుకుని అప్పగిస్తానని షాకింగ్ కామెంట్లు చేశారు. రాఘవ విషయంలో విచారణ నిష్పక్షపాతంగా జరగాలని కోరుకుంటున్నానని అన్నారు.
చట్టానికి, విచారణకు సహకరిస్తానని, పోలీసుల దర్యాప్తుకు నా కుమారుడు సహకరించేలా బాధ్యత తీసుకుంటా అని హామీ ఇచ్చారు. ఇకపై తన కుమారుడు రాఘవను నియోజకవర్గానికి, పార్టీ కార్యకలాపాలకు దూరంగా ఉంచుతానని వనమా ఆ లేఖలో పేర్కొన్నారు. అయితే, అంతకుముందు కూడా వనమా రాఘవపై పలు ఆరోపణలు వచ్చాయి. గతంలో పాల్వంచ ఎస్ఐ, ఆ తర్వాత మలిపెద్ది వెంకటేశ్వర్లు, ఇప్పుడు రామకృష్ణ కుటుంబం ఎపిసోడ్‌లకు రాఘవే కారణమని విపక్ష నేతలు విమర్శలు గుప్పిస్తున్నారు.
