ఆహా ఓటీటీలో నవంబరు నుంచి అన్ స్టాపబుల్ విత్ ఎన్బీకే సీజన్ 2 ప్రసారం కాబోతున్న సంగతి తెలిసిందే. ఈ క్రమంలోనే ఈ సీజన్ కు సంబంధించి రూపొందించిన అన్ స్టాపబుల్ యాంథమ్ వైరల్ అయింది. ఇక, ఈ సీజన్ తొలి షోకు గెస్ట్ గా టీడీపీ అధినేత నారా చంద్రబాబు నాయుడు రాబోతున్న విషయం సంచలనం రేపుతోంది. ఈ క్రమంలోనే అన్‌స్టాప‌బుల్ విత్ ఎన్బీకే-2 షో షూటింగ్ శరవేగంగా సాగుతోంది.
ఈ క్రమంలోనే తాజాగా రెండో సీజన్ కు సంబంధించిన ట్రైలర్ ను విడుదల చేసేందుకు రెడీ అవుతున్నారు నిర్వాహకులు. ద‌ర్శ‌కుడు ప్రశాంత్ వర్మ రూపొందించిన ఈ ట్రైలర్ ప్రోమో తాజాగా రిలీజై ట్రెండ్ అవుతోంది.హైదరాబాద్‌లోని సారథి స్టూడియోలో, అన్నపూర్ణ సెట్ లో చిత్రీకరించిన ఈ ప్రోమోలో నందమూరి నటసింహ బాలకృష్ణ నెవర్ బిఫోర్ గెటప్ లో కనిపించారు. ఇండియాన జోన్స్ లో నిధి అన్వేకుడి గెటప్ లో బాలయ్య కౌబాయ్ ను తలపిస్తున్నారు.
ద‌స‌రా సంద‌ర్భంగా బెజవాడ దుర్గమ్మ సాక్షిగా ఈ ట్రైలర్ రిలీజ్ విడుదల చేసేందుకు ఆహా రెడీ అయ్యింది. నెవర్ బిఫోర్..ఎవర్ ఆఫ్టర్ అన్న రీతిలో ఓ ఓటీటీ టాక్ షోకు ప్రి రీలీజ్ ఈవెంట్ ను కూడా నిర్వహించబోవడం విశేషం. బెజవాడలో ఈ ప్రీ రిలీజ్ ఈవెంట్ ను గ్రాండ్ గా ప్లాన్ చేశారు. సీజన్ 1 ప్రోమో షూట్ తర్వాత బాలకృష్ణతో మరోసారి పని చేయాలని భావించానని ప్రశాంత్ వర్మ వెల్లడించారు. ఈసారి కూడా తనకు అవకాశం దక్కిందని,సీజన్ 2 ట్రైలర్ కోసం స్టోరీ రాయాలన్న వెంటనే ఓకే చెప్పానని అన్నారు. బాలయ్యతో పని చేయడం చాలా సంతోషంగా ఉందని, ఈ సీజన్ కూడా జనాలకు నచ్చుతుందని అన్నారు.
