ద‌ర్శ‌క ధీరుడు జ‌క్క‌న్న తెర‌కెక్కించిన ‘బాహుబలి’తో యంగ్ రెబల్ స్టార్ ప్రభాస్ కు ప్రపంచవ్యాప్తంగా గుర్తింపు వ‌చ్చిన సంగ‌తి తెలిసిందే. అమ‌రేంద్ర బాహుబలి పాత్రకు ప్రాణం పోసిన ప్రభాస్ న‌ట‌న‌కు ప్రేక్ష‌కుల‌తో పాటు విమ‌ర్శ‌కులు కూడా ఫిదా అయిపోయారు. దీంతో, ప్రభాస్ వరుసగా పాన్ ఇండియా సినిమాలు చేస్తూ బాలీవుడ్ లోనూ పాగా వేసేందుకు ప్రయత్నిస్తున్నాడు. సాహో, రాధేశ్యామ్, ఆది పురుష్, ప్రాజెక్ట్ కే, సలార్ వంటి పాన్ ఇండియా చిత్రాలను లైన్ లో పెట్టిన ప్రభాస్ తాజాగా మరో ఘనత సాధించినట్టు తెలుస్తోంది.
తాజాగా ఈ పాన్ ఇండియా స్టార్ ఓ హాలీవుడ్ మూవీ చేయబోతున్నట్లుగా ప్రచారం జరుగుతోంది. ఓ సూపర్ హీరో మూవీ కోసం ప్రపంచ ప్రఖ్యాత ప్రొడక్షన్స్ హౌస్ యూనివర్సల్ స్టూడియోస్ తో ప్రభాస్ చర్చలు జరుపుతున్నాడని తెలుస్తోంది. ఈ ప్రాజెక్ట్ గురించి ఆల్రెడీ రెండు సార్లు డిస్కషన్స్ కూడా జరిగాయని తెలుస్తోంది. బాహుబలితో యూనివర్సల్ స్టూడియోస్ ఓ సూపర్ హీరో మూవీ సిరీస్ నే తెరకెక్కించేందుకు ప్లాన్ చేస్తోందని టాక్. అయితే, ప్రభాస్ హాలీవుడ్ ఎంట్రీపై గతంలోనూ పుకార్లు వచ్చాయి. మిషన్ ఇంపాజిబుల్ డైరెక్టర్ తో ఓ సినిమా చేయబోతున్నాడని, మరో డైరెక్టర్ తో హారర్ మూవీతో హాలీవుడ్ లో లాంచ్ కాబోతున్నాడని ప్రచారం జరిగింది. కానీ, ఆ ప్రాజెక్టులేవీ పట్టాలెక్కలేదు. అయితే, యూనివర్సల్ స్టూడియోస్ ప్రాజెక్టు మాత్రం పక్కా అని తెలుస్తోంది.
ఇక, హాలీవుడ్ ఎంట్రీకి యంగ్ రెబల్ స్టార్ కూడా ఉత్సాహంగా ఉన్నట్టు తెలుస్తోంది. ‘బాహుబలి’తో ప్రభాస్ పేరు ప్రపంచవ్యాప్తంగా మార్మోగిన నేపథ్యంలోనే యూనివర్సల్ స్టూడియోస్ ఈ ప్రాజెక్టును లైన్ లో పెట్టిందట. ‘స్పైడర్ మేన్, బ్యాట్ మేన్, కెప్టెన్ అమెరికా’ వంటి సూపర్ హీరో మూవీ సిరీస్ లకు ప్రపంచవ్యాప్తంగా అభిమానులున్నారు. ఇదే కోవలో ప్రభాస్ కూడా సూపర్ హీరో సిరీస్ తో హాలీవుడ్ ఎంట్రీ ఇవ్వనున్నాడా లేదా అన్నది తేలాలంటే మరి కొద్దిరోజులు వేచిచూడక తప్పదు.
