కన్నడ రాకింగ్ స్టార్ యష్, డైరెక్టర్ ప్రశాంత్ నీల్ ల కాంబోలో తెరకెక్కిన ‘కేజీఎఫ్’ సినిమా…అఖండ విజయం సాధించిన సంగతి తెలిసిందే. ఏ మాత్రం అంచనాలు లేకుండా విడుదలైన ఈ చిత్రం…దక్షిణాదితోపాటు దేశవ్యాప్తంగా బ్లాక్ బస్టర్ హిట్ గా నిలిచింది. పాన్ ఇండియా మూవీగా పలు రికార్డులు క్రియేట్ చేసిన ఈ సినిమా కన్నడ బాహుబలిగా నిలిచి కొత్త ట్రెండ్ క్రియేట్ చేసింది. రాఖీ భాయ్ గా యశ్ నటనకు దేశవ్యాప్తంగా సినీ అభిమానులు ఫిదా అయ్యారు. దీంతో, ‘కేజీఎఫ్ : చాప్టర్ 2’ కోసం యావత్ భారతదేశపు సినీ అభిమానులు ఎంతో ఆసక్తిగా ఎదురుచూస్తున్నారు.
ఇప్పటికే విడుదలైన ఈ పాన్ ఇండియా మూవీ టీజర్ యూట్యూబ్ లో రికార్డు వ్యూస్ సొంతం చేసుకుంది. ఏప్రిల్ 14న ఈ సినిమా విడుదల కాబోతోన్న నేపథ్యంలో తాజాగా ‘కేజీఎఫ్ చాప్టర్ -2’ నుంచి మరో ఇంటరెస్టింగ్ అప్డేట్ ను చిత్ర యూనిట్ రిలీజ్ చేసింది. ప్రమోషన్స్‌ వేగం పెంచిన చిత్ర యూనిట్…ఆ చిత్రం నుంచి ఫస్ట్ లిరికల్ సాంగ్ రిలీజ్ చేసింది. తుఫాన్‌ అంటూ సలాం రాఖీ భాయ్ తరహాలో సాగే ఈ పాటలో చిత్ర కథ ఎలా ఉండబోనుందో ప్రశాంత్ నీల్ చెప్పకనే చెప్పేశాడు.
తమలో ధైర్యాన్ని నింపిన రాఖీ భాయ్‌ని పొగుడుతూ గోల్డ్‌ మైన్‌లోని కార్మికులు పాడుతున్న ఈ పాట…యూట్యూబ్ లో దుమ్ము రేపుతోంది. విడుదలైన గంటలోనే దాదాపు మిలియన్ వ్యూస్ ను ఈ పాట సొంతం చేసుకుందంటే కేజీఎఫ్ మేనియా ఏ రేంజ్ లో ఉందో అర్థం చేసుకోవచ్చు. బానిసలుగా ఉన్న జనంలో ధైర్యం నింపిన రాఖీ భాయ్ అక్కడి ప్రజలతో ఎలా కలిసిపోయి కేజీఎఫ్ ను ఎలా ఏలుతున్నాడో ఈ పాటలో చెప్పేశారు.
రామజోగయ్య శాస్త్రి అద్భుతంగా రాసిన ఈ పాట…సలామ్ రాఖీ భాయ్ తరహాలో రికార్డు వ్యూస్ సొంతం చేసుకుంటుందనడంలో ఎటువంటి సందేహం లేదు. ‘మీరు అతనికి అడ్డు నిలబడకండి సార్’ అంటూ రాఖీ భాయ్ ను ఎలివేట్ చేసే ఈ మాస్ ట్రాక్ ఇటు క్లాస్..అటు మాస్ అందరినీ ఆకట్టుకుంటోంది. కేజీఎఫ్ చాప్టర్-1కు సంగీతం అందించిన బస్రూర్ రవి ఈ చిత్రానికి కూడా అదే రేంజ్ లో అదిరిపోయే సంగీతాన్ని అందించాడు.
