టాలీవుడ్ స్టార్ హీరోయిన్ సమంత పై మంత్రి కొండా సురేఖ చేసిన వ్యాఖ్యలు ఇరు తెలుగు రాష్ట్రాల రాజకీయాలతో పాటు సినీ పరిశ్రమలో కూడా ప్రకంపనలు రేపిన సంగతి తెలిసిందే. మంత్రి కేటీఆర్ పై విమర్శలు గుప్పించే క్రమంలో సురేఖ వివాదాస్పద వ్యాఖ్యలు చేయడం సంచలనం రేపింది. అయితే, కేటీఆర్ గురించి మాట్లాడే క్రమంలో అనుకోకుండా అలా మాట్లాడాల్సి వచ్చిందని తన వ్యాఖ్యలను సురేఖ ఉపసంహరించుకున్నారు. ఈ క్రమంలోనే తాజాగా సోషల్ మీడియాలో మరో కొత్త వాదన పైకి వచ్చింది.
సమంత పెళ్ళి, విడాకుల విషయం గురించి కొండా సురేఖ విమర్శలు గుప్పించగానే మొత్తం టాలీవుడ్ సురేఖపై విమర్శల దాడికి దిగిందని, కానీ గతంలో పవన్ కళ్యాణ్ పెళ్లిళ్ల విషయంలో రాజకీయ ప్రత్యర్థులు పదేపదే విమర్శలు చేస్తున్నప్పటికీ టాలీవుడ్ నుంచి ఎవరు ఖండించలేదని సోషల్ మీడియాలో నెటిజన్లు కామెంట్లు పెడుతున్నారు. పవన్ కు మద్దతుగా ఒక్కరూ నోరు మెదపలేదని విమర్శిస్తున్నారు. ఇండస్ట్రీ డబుల్ స్టాండర్డ్స్ మెయింటైన్ చేస్తోందని నెటిజన్లు విమర్శిస్తున్నారు. పవన్ కు ఒక న్యాయం సమంతకు మరొక న్యాయం అన్నరీతిలో సినీ ప్రముఖులు ప్రవర్తిస్తారా అని నెటిజన్లు ప్రశ్నిస్తున్నారు. ఇండస్ట్రీ పెద్దలు ఇకపై అయినా అందరూ నటీనటులు, ఇండస్ట్రీకి చెందిన వారి విషయంలో ఒకేలాగా వ్యవహరించాలని కోరుకుంటున్నారు.
ఇక, విశ్వవిఖ్యాత నట సార్వభౌమ నందమూరి తారక రామారావు తనయురాలు, టీడీపీ అధినేత నారా చంద్రబాబు నాయుడు సతీమణి నారా భువనేశ్వరిపై వైసీపీ నేతలు జుగుప్సాకరమైన రీతిలో వివాదాస్పద వ్యాఖ్యలు చేసినప్పుడు స్పందించిన జూనియర్ ఎన్టీఆర్…ఇప్పుడు సమంత విషయంలో మాత్రం వెంటనే స్పందించారని నెటిజన్లు ట్రోల్ చేస్తున్నారు. సమంత విషయంలో స్పందించడం తప్పు కాదని, తన అత్తమ్మను అన్నపుడు నోరు మెదపని తారక్ ఇపుడు మాత్రం వెంటనే రియాక్ట్ కావడం ఆశ్చర్యం కలిగించిందని కామెంట్లు పెడుతున్నారు. చంద్రబాబు జైల్లో ఉన్నపుడు కూడా తారక్ స్పందించలేదని కామెంట్లు పెడుతున్నారు. ఎన్టీఆర్ పేరు తీసేసి వైఎస్ఆర్ పేరును హెల్త్ యూనివర్సిటీకి పెట్టినపుడు కూడా గోడమీద పిల్లిలాగా మొక్కుబడిగా స్పందించాడని ట్రోల్ చేస్తున్నారు.
