కరోనా కాలం.. ఎప్పుడేం జరుగుతుందో చెప్పలేని దుస్థితి. రోజు తిరిగేసరికి ఎవరి గురించి ఎలాంటి వార్తలు వినాల్సి వస్తుందో అర్థం కాని పరిస్థితి. కరోనా మహమ్మారి కారణంగా చోటు చేసుకుంటున్న మరణాలు అన్నిఇన్ని కావు. తాజాగా టాలీవుడ్ లో ప్రతి ఒక్కరికి సుపరిచితమైన వ్యక్తి కమ్ నిర్మాత కమ్ వంద సినిమాలకు పీఆర్వోగా వ్యవహరించిన బీఏ రాజు కరోనాకు కాటుకు బలయ్యారు.
సినీ జర్నలిస్టుగా కెరీర్ షురూ చేసిన ఆయన తెలుగు చిత్ర పరిశ్రమలో ప్రతి ఒక్కరికి సుపరిచితుడు. నాలుగున్నర దశాబ్దాలుగా టాలీవుడ్ కు సన్నిహితుడైన ఆయన పలు చిత్రాల్ని నిర్మించారు. అంతేకాదు.. సూపర్ హిట్ అనే సినీ పత్రికతో మంచి పేరును సంపాదించుకున్నారు. అగ్ర హీరోలతో పాటు ఎన్నో సినిమాలకు పీఆర్వోగా మాత్రమే కాదు.. చాలామంది నటీనటుల వ్యక్తిగత డేట్స్ చూసేశారు.
సినీ పరిశ్రమలో ప్రతి ఒక్కరికి తెలిసిన బీఏ రాజు గడిచిన కొద్ది రోజులుగా కరోనాతో బాధ పడుతున్నారు.
శుక్రవారం అర్థరాత్రి ఆయన హైదరాబాద్ లోని తన ఇంట్లో కన్నుమూశారు. హటాత్తుగా వచ్చిన గుండెపోటు ఆయన్ను బలి తీసుకుందని చెబుతున్నారు.
ఆయన మరణ వార్త టాలీవుడ్ కు విషాదంగా మారింది. బీఏ రాజుతో తమకున్న అనుబంధాన్ని ప్రతి ఒక్కరు గుర్తు చేసుకుంటున్నారు. ఆయన మరణం పట్ల పలువురు దిగ్భ్రాంతి వ్యక్తం చేస్తున్నారు. ఆయన సతీమణి బీఏ జయ దర్శకురాలిగా పలు చిత్రాలు నిర్మించారు. రెండేళ్ల క్రితం ఆమె కన్నుమూశారు.
