మెగాస్టార్ చిరంజీవి హీరోగా నటించిన గాడ్ ఫాదర్ చిత్రం విడుదలైన అన్ని సెంటర్లలోనూ మంచి వసూళ్లు రాబట్టి హిట్ చిత్రంగా నిలిచింది. అయితే లూసిఫర్ మలయాళం చిత్రం రీమేక్ గా వచ్చిన గాడ్ ఫాదర్ లో చిరంజీవి ఇమేజ్ కు తగ్గట్టుగా పాత్ర తీరు లేదు. అయినా సరే ప్రేక్షకులు ఈ చిత్రానికి బ్రహ్మరథం పట్టారు. ఈ నేపథ్యంలోనే చిరుకి భారీగా ఉన్న మాస్ ఇమేజ్ నేపథ్యంలో తెరకెక్కుతున్న వాల్తేరు వీరయ్య చిత్రంపై భారీ అంచనాలు ఉన్నాయి.
యువ దర్శకుడు బాబీ తెరకెక్కిస్తున్న వాల్తేరు వీరయ్య చిత్రంలో చిరు పాత్ర మాస్ కు పూనకాలు తెప్పిస్తుందని టాక్ ఉంది. ఈ క్రమంలోనే ఇప్పటిదాకా ఆ చిత్రం నుంచి విడుదలైన ప్రతి అప్డేట్ కి విపరీతమైన స్పందన వచ్చింది. రిలీజ్ డేట్ దగ్గర పడుతున్న నేపథ్యంలో తాజాగా ‘వాల్తేరు వీరయ్య’ చిత్రం నుంచి టైటిల్ సాంగ్ ను చిత్ర యూనిట్ విడుదల చేసింది. దేవిశ్రీ ప్రసాద్ స్వరాలందించిన ఆ పాటకు చంద్రబోస్ సాహిత్యం అందించారు.
‘భగ భగ భగ మండే.. మగ మగ మగాడురా వీడే.. జగ జగ జగాన్ని చెండాడే.. ధగ ధగ జ్వలించు సూరీడే.. అగాధ గాథల అనంత లోతుల.. సముద్ర సోదరుడే వీడే.. వినాశ కారుల స్మశానమౌతాడే.. తుఫాను అంచున తపస్సు చేసే వశిష్ఠుడంటే అది వీడే.. తలల్ని తీసే విశిష్టుడే వీడే’ అంటూ వీరయ్య క్యారెక్టర్‌‌‌‌ను హైలెట్‌ చేస్తూ చంద్రబోస్ రాసిన పవన్ ఫుల్ లిరిక్స్ ఆకట్టుకుంటున్నాయి. ఇక, అనురాగ్ కులకర్ణి ఎనర్జిటిక్‌‌గా పాడడంతో ఆ పాట చార్ట్ బస్టర్ కావడం ఖాయమని మెగా ఫ్యాన్స్ అంటున్నారు.
గతంలో మాస్ లుక్ లో వీరయ్య పోస్టర్ విడుదల చేసిన చిత్ర యూనిట్…తాజాగా మరో పోస్టర్‌‌‌‌లో మెషీన్ గన్‌ పట్టుకుని పవర్ ఫుల్ గెటప్‌‌లో స్టైలిష్‌‌గా ఉన్న చిరు లుక్ రివీల్ చేసింది. చిరంజీవికి జంటగా శ్రుతిహాసన్ నటిస్తున్న ఈ చిత్రంలో రవితేజ కీలక పాత్ర పోషిస్తున్నాడు. మైత్రీ మూవీ మేకర్స్‌ సంస్థ నిర్మిస్తున్న ఈ చిత్రం జనవరి 13న విడుదల కానుంది. ఈ చిత్ర థియేట్రికల్ ట్రైలర్ ను జనవరి 4న విడుదల చేసేందుకు ప్రయత్నిస్తున్నట్లు తెలుస్తోంది.
