ఈ సెప్టెంబ‌ర్ నంద‌మూరి ఫ్యాన్స్ కి చాలా స్పెష‌ల్ గురూ..!

2024 సెప్టెంబ‌ర్ నంద‌మూరి ఫ్యాన్స్ కి చాలా చాలా స్పెష‌ల్ గా మార‌బోతోంది. నందమూరి బాలకృష్ణ తెలుగు సినీ పరిశ్రమలో 50 ఏళ్లు పూర్తి చేసుకుంటున్న సందర్భంగా సెప్టెంబర్ 1న హైదరాబాద్‌లో గ్రాండ్‌గా ఓ ఈవెంట్‌ను నిర్వహిస్తున్నారు. ఈ ఈవెంట్ లో బాల‌కృష్ణ‌కు ఘ‌నంగా సన్మానం చేయ‌బోతున్నారు. ఈ సన్మాన వేడుకకు తెలుగుతో పాటు ఇతర భాషలకు చెందిన సినీ ప్రముఖులు, రాజ‌కీయ నాయ‌కులు మ‌రియు భారీ సంఖ్య‌లో అభిమానులు హాజ‌రు కాబోతోన్నారు.

అలాగే సెప్టెంబర్ 6న బాల‌కృష్ణ త‌న‌యుడు నంద‌మూరి మోక్షజ్ఞ తేజ పుట్టినరోజు. అయితే ఈసారి బ‌ర్త్‌డేకి ఒక స్పెషాలిటీ ఉంది. నంద‌మూరి ఫ్యాన్స్ ఎప్పుడెప్పుడా అని వెయ్యి క‌ళ్ల‌తో ఎదురు చూస్తున్న మోక్షజ్ఞ డెబ్యూ మూవీ లాంఛింగ్ ఆ రోజు జ‌ర‌గ‌బోతోంది. హ‌నుమాన్ మూవీతో ఇండియ‌న్ బాక్సాఫీస్ ను షేక్ చేసిన డైరెక్ట‌ర్ ప్ర‌శాంత్ వ‌ర్మ మోక్షజ్ఞను హీరోగా టాలీవుడ్ కి ప‌రిచ‌యం చేయ‌బోతున్నారు. నిర్మాత‌గా బాల‌య్య చిన్న కూతురు తేజ‌స్విని వ్య‌వ‌హ‌రించ‌బోతోంది. సెప్టెంబ‌ర్ 6న పూజా కార్య‌క్ర‌మాల‌తో వీరి చిత్రం ప్రారంభం కానుంది.

ఇక లాస్ట్ బ‌ట్ నాట్ లీస్ట్‌.. సెప్టెంబ‌ర్ 27న జూనియ‌ర్ ఎన్టీఆర్, కొర‌టాల శివ కాంబినేష‌న్ లో తెర‌కెక్కుతున్న `దేవ‌ర పార్ట్ 1` పాన్ ఇండియా స్థాయిలో విడుద‌ల కాబోతోంది. ఆర్ఆర్ఆర్ త‌ర్వాత ఎన్టీఆర్ నుంచి వ‌స్తున్న చిత్ర‌మిది. ఇందులో శ్రీ‌దేవి కూతురు జాన్వీ క‌పూర్ హీరోయిన్ గా యాక్ట్ చేస్తోంది. ఎన్టీఆర్ ఆర్ట్స్, యువసుధ ఆర్ట్స్ బ్యానర్‌లపై అత్యంత భారీ బ‌డ్జెట్ తో దేవ‌ర చిత్రాన్ని నిర్మిస్తున్నారు.