కొందరు నేతలకు టాలెంట్ టన్నుల కొద్దీ ఉన్నా.. కాలం కలిసి రాదు. ఆ కోవలోకే వస్తారు కాంగ్రెస్ ఫైర్ బ్రాండ్ నేత ఫిరోజ్ ఖాన్. గతంలో ప్రజారాజ్యంలో తర్వాతి కాలంలో కాంగ్రెస్ పార్టీలో చేరిన ఆయన.. వాగ్ధాటి.. మజ్లిస్ అధినేత అసద్.. ఆయన సోదరుడు అక్బరుద్దీన్ లను ఎదుర్కొని వారికి ధీటుగా వ్యవహరించే అతి కొద్ది ముస్లిం నేతల్లో ఫిరోజ్ ఖాన్ ఒకరు. ఓవైసీ ఫ్యామిలీ అంటే అస్సలు పడని.. మితవాద రాజకీయ నేతగా.. లౌకిక భావాలున్న నేతగా సుపరిచితుడైన ఫిరోజ్ ఖాన్.. నాంపల్లి నియోజకవర్గానికి చెందిన వారు.
తాజాగా ఆయన కుటుంబానికి కోలుకోలేని దెబ్బ తగిలింది. ఆదివారం అర్థరాత్రి దాటిన తర్వాత శంషాబాద్ శివారులో జరిగిన రోడ్డు ప్రమాదంలో ఫిరోజ్ ఖాన్ కుమార్తె పాతికేళ్ల తానియా దుర్మరణం పాలయ్యారు. టీపీసీసీ మైనార్టీ విభాగానికి చెందిన ముఖ్యనేతగా సుపరిచితుడైన ఫిరోజ్ ఖాన్ కుమార్తె తానియా బ్యూటీషియన్ గా వ్యవహరిస్తుంటారు.
ఐ20 కారులో వస్తుండగా.. అదుపు తప్పిన కారు డివైడర్ ను బలంగా ఢీ కొట్టినట్లు చెబుతున్నారు. ఈ ప్రమాదంలో ఆమె మరణించగా.. కారులోని మరో ఇద్దరికి గాయాలైనట్లుగా చెబుతున్నారు. తానియా డెడ్ బాడీని ఉస్మానియా ఆసుపత్రికి తరలించారు. అక్కడే పోస్టుమార్టం నిర్వహించి.. ఆమె కుటుంబ సభ్యులకు అందజేశారు.
ఈ ప్రమాదాన్ని నమోదు చేసుకున్న పోలీసులు విచారణ జరుపుతున్నారు. ప్రమాదంలో గాయపడ్డ వారిని స్థానికులు ఆసుపత్రికి తరలించారు. వారు ప్రస్తుతం చికిత్స పొందుతున్నారు. ఈ ఉదంతం ఫిరోజ్ ఖాన్ కుటుంబానికి కోలుకోలేనిదిగా మారిందంటున్నారు.
అతివేగం ప్రమాదకరం:: కాంగ్రెస్ మాజీ ఎమ్మెల్యే #ఫిరోజ్_ఖాన్ కూతురు #తన్యఖకడే శంషాబాద్ దగ్గర జరిగిన రోడ్డుప్రమాదంలో ప్రాణాలు కోల్పోయారు. అతివేగంతో వస్తూ డివైడర్ ను ఢీకొట్టిన కారు.!! pic.twitter.com/2yXApC8MOI
— Sravani Journalist (@sravanijourno) August 1, 2022
