టీడీపీ జాతీయ ప్రధాన కార్యదర్శి నారా లోకేష్ పై వైసీపీ ఫైర్ బ్రాండ్ నేత, మంత్రి రోజా అవాకులు చవాకులు పేలుతున్నారని టీడీపీ నేతలు విమర్శిస్తున్న సంగతి తెలిసిందే. అధికారం ఉంది కదా అని నోటికి వచ్చినట్లు ప్రతిపక్ష నేతలను దూషించడం వైసీపీ నేతలకు పరిపాటిగా మారిందని టీడీపీ నేతలు దుయ్యబడుతున్నారు. ఈ క్రమంలోనే మంత్రి రోజాపై టీడీపీ నేత ఆనం వెంకటరమణారెడ్డి సంచలన వ్యాఖ్యలు చేశారు.
జగన్ దయ వల్ల రోజా చెప్పులు మోసే స్థాయి నుంచి…చెప్పులు మోయించే స్థాయికి వచ్చిందని ఆనం ఎద్దేవా చేశారు. తన సిబ్బంది చేత రోజా చెప్పులు మోయించారన్న వార్తలకు ఆయన స్పందించారు. లోకేష్ నుద్దేశించి నోటికొచ్చినట్టు రోజా మాట్లాడుతోందని, లోకేష్ ను పిత్రి, గిత్రి అని విమర్శిస్తే మామూలుగా ఉండదని రోజాకు ఆనం వార్నింగ్ ఇచ్చారు. ఆఖరికి తిరుమల వెంకన్న స్వామి దర్శనాలను కూడా అమ్ముకునే స్థాయికి రోజా దిగజారిందని చురకలంటించారు. రోజా వ్యాపారాలు ఓ రేంజ్ లో ఉన్నాయని నగరి ప్రజలే విమర్శిస్తున్నారని అన్నారు.
కాగా, గతంలోనూ వైసీపీ అధినేత జగన్ పై ఆనం సెటైర్లు వేసిన సంగతి తెలిసిందే. ఏపీని గంజాయి రవాణాలో నంబర్ వన్ గా నిలిపిన సందర్భంగా కేక్ కటింగ్ చేసి మరీ జగన్ ఫొటోకు తినిపించి సెటైరికల్ గా ఆనం నిరసన తెలిపారు. జగన్ పాలనలో రాష్ట్రంలో గంజాయి విచ్చలవిడిగా దొరుకుతోందని, తాము ఎన్ని ఫిర్యాదులు చేసినా పట్టించుకోకపోవడంతోనే ఏపీ గంజాయి వాడకంలో నెం.1గా నిలిచిందని ఆనం గతంలో ఎద్దేవా చేశారు.
గంజాయి రవాణాలో జగన్ సాధించిన సక్సెస్ ను సెలబ్రేట్ చేస్తూ కేక్ కట్ చేశామని, ఆయన ఫొటోకు కేక్ తినిపించామని చెప్పారు. అప్పట్లో దానికి సంబంధించిన వీడియో సోషల్ మీడియాలో వైరల్ అయింది.
