‘‘ నేను ఎటువైపు ఉన్నానంటూ ఎవరైనా అడిగితే.. ఖచ్చితంగా మా కుటుంబం వైపే ఉంటాను. ఏ విధమైన అంశాలు ఆశించకుండా మా మామయ్య గారికి విష్ చేస్తున్నాను’’ అని దివంగత నందమూరి నటుడి తారకరత్న సతీమణి అలేఖ్య ఎక్స్ వేదికగా వెల్లడించడం గమనార్హం.
ఈ ఎన్నికలలో నందమూరి బాలకృష్ణకు మద్దతు ఇస్తున్నట్లు అలేఖ్య రెడ్డి పరోక్షంగా స్పష్టం చేశారు. హిందూపురం నుంచి టీడీపీ ఎమ్మెల్యే అభ్యర్థిగా నందమూరి బాలకృష్ణ మూడోసారి పోటీ చేస్తున్నారు. ఇప్పటికే రెండు సార్లు గెలుపొందిన ఆయన హ్యాట్రిక్ విజయం సాధించే ప్రయత్నంలో ఉన్న నేపథ్యంలో ఈ పోస్ట్ ప్రాధాన్యం సంతరించుకున్నది.
2023 జనవరి 27వ తేదీన టీడీపీ జాతీయ ప్రధాన కార్యదర్శి నారా లోకేశ్ కుప్పంలో యువగళం పేరిట పాదయాత్రకు శ్రీకారం చుట్టారు. ఆ పాదయాత్రలో తారకరత్న పాల్గొన్నారు. అయితే ఆయన అదే కార్యక్రమంలో తీవ్ర అనారోగ్యంతో కుప్పంలో కుప్పకూలిపోయారు. దీంతో ఆయన్ని బెంగళూరులోని నారాయణ హృదయాల ఆసుపత్రికి తరలించారు. అక్కడ చికిత్స పొందుతూ ఫిబ్రవరిలో మరణించారు. ఆ సమయంలో నందమూరి ఫ్యామిలీ, నారా ఫ్యామిలీ అలేఖ్య కుటుంబానికి అండగా నిలిచింది.
అయితే వైసీపీ రాజ్యసభ సభ్యుడు విజయ సాయిరెడ్డికి అలేఖ్య సమీప బంధువు కావడం విశేషం. స్కిల్ డెవలప్ మెంట్ కేసులో చంద్రబాబు అరెస్ట్ అయిన నేపథ్యంలో ఎన్టీఆర్ ట్రస్ట్ భవన్ లో అలేఖ్య టీడీపీ నిర్వహించిన దీక్షలో కూర్చోవడం విశేషం. ఈ నేపథ్యంలో తాజాగా తన స్టేట్ మెంట్ వైరల్ గా మారింది.
