2024 సార్వ‌త్రిక ఎన్నిక‌ల తర్వాత ఏపీలో వైసీపీ ప‌రిస్థితి రోజురోజుకు దిగ‌జారిపోతుంది. కీల‌క నాయ‌కులంతా ఒక్కరి తర్వాత ఒక‌రు పార్టీని మార్చేస్తున్నారు. మొన్న‌టికి మొన్న జగన్ కు అత్యంత స‌న్నిహితుడు, వైసీపీ రాజ్య‌స‌భ స‌భ్యుడు విజయసాయిరెడ్డి రాజకీయాల నుంచి త‌ప్పుకుంటున్న‌ట్లు ప్ర‌క‌టించారు. ఇప్ప‌డికే ఎంపీ ప‌ద‌వికి రాజీనామా చేశారు. రేపో మాపో పార్టీ స‌భ్య‌త్వానికి కూడా రాజీనామా చేస్తాన‌ని ప్ర‌క‌టించారు. అయితే విజయసాయిరెడ్డి బాట‌లోనే మ‌రో వైసీపీ ఎంపీ ఆళ్ల అయోధ్య రామిరెడ్డి న‌డ‌వ‌బోతున్న‌ట్లు పెద్ద ఎత్తున వార్త‌లు వ‌చ్చాయి.
త్వ‌ర‌లోనే రాజ్య‌స‌భ స‌భ్య‌త్వానికి, వైసీపీకి అయోధ్య రామిరెడ్డి రాజీనామా చేసి కూట‌మిలో చేర‌బోతున్నారంటూ ప్ర‌చారం జ‌రుగుతుండ‌టంతో.. తాజాగా ఆయ‌న రియాక్ట్ అయ్యారు. మీడిమా ముఖంగా పార్టీ మార్పుపై ఎంపీ అయోధ్య రామిరెడ్డి క్లారిటీ ఇచ్చారు. వైసీపీకి రాజీనామా చేస్తున్నట్లు రెండు మూడు రోజులుగా మీడియాలో జ‌రుగుతున్న ప్ర‌చారం పూర్తిగా అవాస్త‌వ‌మ‌ని అయోధ్య రామిరెడ్డి తేల్చి చెప్పారు. అదంతా పుకారేన‌ని.. తాను పార్టీ మారడం లేదని స్ప‌ష్టం చేశారు.
కూటమి ప్రభుత్వం ఏర్పాటైన తర్వాత వైసీపీ నేతలపై ఒత్తిడి బాగా పెరిగిందని.. కానీ, రాజకీయాల్లో ఉన్నప్పుడు ఒత్తిళ్లు సహజమేన‌ని, వాటిని తట్టుకుని నిలబడాలని ఈ సంద‌ర్భంగా ఎంపీ అయోధ్య రామిరెడ్డి వ్యాఖ్యానించారు. విజయసాయిరెడ్డి రాజీనామా గురించి మీడియా ప్ర‌శ్నించాగా.. ఒత్తిళ్ల‌కు భ‌య‌ప‌డే వ్య‌క్తి విజయసాయిరెడ్డి కాదు. రాజకీయాల నుంచి ఎందుకు వెళ్లిపోయారో ఆయనే స్వ‌యంగా చెప్పారు, కాబ‌ట్టి ఆ ప్ర‌స్తావ‌న అన‌వ‌స‌రమ‌ని అయోధ్య రామిరెడ్డి పేర్కొన్నారు. ఇక వైసీపీలో కొన్ని లోపాలు ఉన్నాయ‌ని.. అన్ని క‌రెక్ట్ గా ఉంటే మొన్న‌టి ఎన్నిక‌ల్లో మ‌ళ్లీ గెలిచేవాళ్ల‌మ‌ని అయోధ్య రామిరెడ్డి అన్నారు. పార్టీలో ఉన్న లోపాల‌ను స‌రిదిద్దుకుంటామ‌ని తెలిపారు.
