మాస్ కా బాప్, స్టార్ హీరో, నందమూరి నటసింహం బాలకృష్ణ హోస్ట్ గా వ్యవహరిస్తున్న ‘అన్ స్టాపబుల్ విత్ ఎన్బీకే’ టాక్ షోకు అద్భుతమైన రెస్పాన్స్ వచ్చిన సంగతి తెలిసిందే. తొలిసారి ఓ టాక్ షోకు హోస్ట్ గా వ్యవహరించిన బాలయ్య దుమ్మురేపడంతో ఆ షో ఐఎండీబీ రేటింగ్స్ లోనూ రికార్డ్ క్రియేట్ చేసింది. ఈ క్రమంలోనే ఈ షో రెండు సీజన్లు ఆహా అనిపించాయి. రెండో సీజన్ లో తొలి ఎపిసోడ్ కు టీడీపీ అధినేత నారా చంద్రబాబునాయుడు, నారా లోకేష్ లు హాజరు కాగా..చివరి ఎపిసోడ్ కు పవన్ కల్యాణ్ హాజరై ఆ సీజన్ కు మంచి ముగింపునిచ్చాడు.
ఈ క్రమంలోనే తాజాగా ‘అన్ స్థాపబుల్ విత్ ఎన్బీకే’ మూడో సీజన్ ఈ నెల 17 నుంచి ‘ఆహా’లో దుమ్మురేపబోతోంది. మూడో సీజన్ తొలి ఎపిసోడ్ లో ‘భగవంత్ కేసరి’ టీమ్ సందడి చేయబోతోందని తెలుస్తోంది. ఆల్రెడీ ఫస్ట్ ఎపిసోడ్ షూటింగ్ పూర్తయిందని సెట్లో నుంచి కొన్ని ఫోటోలు లీకయ్యాయి. తొలి ఎపిసోడ్ లో అనిల్ రావిపూడి, కాజల్, శ్రీ లీల సందడి చేసినట్టు తెలుస్తోంది. ఈ సారి సీజన్ లో బాలయ్య రెట్టించిన ఉత్సాహంతో కనిపించారు. యంగ్ బ్యూటీ శ్రీ లీల తొలి ఎపిసోడ్ కు స్పెషల్ జ్యుయలరీతో స్పెషల్ ఎట్రాక్షన్ గా నిలిచింది.
