రెండేళ్ల కిందట ‘పెళ్ళి సందD’ సినిమాతో పూర్తి స్థాయి హీరోగా అరంగేట్రం చేశాడు శ్రీకాంత్ కొడుకు రోషన్. ఆ సినిమా కంటెంట్ పరంగా చూస్తే మరీ ముతక. ఎప్పుడో తొంభైల్లో వచ్చేవి ఆ టైపు సినిమాలు. కానీ హీరో హీరోయిన్లిద్దరి ఆకర్షణ.. పాటలు.. రిలీజ్ టైమింగ్ కలిసొచ్చి ఆ చిత్రం బాక్సాఫీస్ దగ్గర బాగానే ఆడింది. ఈ సినిమాలో హీరోయిన్‌గా నటించిన శ్రీలీల ఇప్పటికే టాలీవుడ్ టాప్ హీరోయిన్లలో ఒకరిగా ఎదిగిపోయింది.
రోషన్‌కు కూడా అవకాశాలకేమీ కొదవలేదు. అతను ఇప్పటికే రెండు సినిమాల్లో నటిస్తున్నాడు. తాజాగా అతడికి కెరీర్లోనే బిగ్గెస్ట్ ఛాన్స్ లభించింది. రోషన్ మలయాళ సూపర్ స్టార్ మోహన్ లాల్‌తో స్క్రీన్ షేర్ చేసుకోబోతుండటం విశేషం. ‘వృషభ’ అనే మలయాళం బేస్డ్ పాన్ ఇండియా సినిమాలో రోషన్ నటించబోతున్నాడు. ఈ న్యూస్ అఫీషియల్‌గానే బయటికి వచ్చింది.
నందకిశోర్ అనే దర్శకుడు రూపొందించనున్న ‘వృషభ’ పెద్ద బ్యాక్‌డ్రాప్‌లో, భారీ బడ్జెట్లో తెరకెక్కబోతోంది. ఇందులో మోహన్ లాల్‌కు రోషన్ కొడుకుగా నటించబోతున్నాడట. మోహన్ లాల్‌కు తెలుగులోనూ ఫాలోయింగ్ పెరుగుతుండటం, ఆయన కూడా పాన్ ఇండియా రేంజికి వెళ్లాలని చూస్తుండటంతో వివిధ భాషల నుంచి నటీనటులను ఆయన సినిమాల్లోకి తీసుకుంటున్నారు. అల్లు శిరీష్, మంచు లక్ష్మీప్రసన్న ఇప్పటికే ఆయనతో స్క్రీన్ షేర్ చేసుకున్న సంగతి తెలిసిందే.
‘వృషభ’లో బాలీవుడ్ నిర్మాణ సంస్థ బాలాజీ టెలీ ఫిలిమ్స్ కూడా భాగస్వామి కావడం విశేషం. దీంతో పాన్ ఇండియా రేంజిలో పెద్ద స్థాయిలోనే ఈ సినిమాను రిలీజ్ చేసే అవకాశముంది. ‘వృషభ’లో సిమ్రాన్.. మోహన్ లాల్‌కు జోడీగా నటించనుందట. మన స్టార్ మ్యూజిక్ డైరెక్టర్ దేవిశ్రీ ప్రసాద్ ఈ చిత్రానికి పని చేయనున్నట్లు సమాచారం.
