ఐకాన్ స్టార్ అల్లు అర్జున్, టాలీవుడ్ లెక్కల మాస్టారు సుకుమార్ ల కాంబోలో తెరకెక్కిన ‘పుష్ప’ చిత్రం పాన్ ఇండియా రేంజ్ లో బ్లాక్ బస్టర్ హిట్ కొట్టిన సంగతి తెలిసిందే. బన్నీకి జంటగా రష్మిక మందన్న నటించిన ఈ చిత్రం తెలుగుతోపాటు బాలీవుడ్ లోనూ భారీ విజయాన్ని అందుకుంది. ఇక,ఈ చిత్రంలో టాలీవుడ్ స్టార్ హీరోయిన్ సమంత చేసిన ఐటమ్ సాంగ్ కు యావత్ భారత దేశం ఫిదా అయింది. ‘ఊ అంటావా మావా…ఊ ఊ అంటావా మావా…’ అంటూ సమంత వేసిన స్టెప్పులకు కుర్రకారు ఫిదా అయిపోయారు.
సమంత ఓ రేంజ్ లో రెచ్చిపోయి చిందులేసిన ఈ ఐటం సాంగ్ యూట్యూబ్ లో సునామీ రేపుతోంది. ‘ఊ అంటావా మావా… ఊఊ అంటావా మావా…’ అంటూ సాగే ఈ మాస్ ఐటం సాంగ్ సోషల్ మీడియా, యూట్యూబ్ లో రిలీజైనప్పటి నుంచే ట్రెండ్ అవుతోంది. ప్రముఖ సింగర్ మంగ్లీ సోదరి ఇంద్రావతి చౌహాన్ హస్కీ వాయిస్ కు సమంత సిజ్లింగ్ లుక్ తోడవడంతో ఈ పాట ప్రభంజనం రేపుతూనే ఉంది. ఈ క్రమంలోనే తాజాగా ఈ పాట మరో అరుదైన రికార్డును బద్దలు కొట్టింది.
యూట్యూబ్ లో ఈ పాట తాజాగా 200 మిలియన్ వ్యూస్ రికార్డును దాటి 250 మిలియన్ల వ్యూస్ వైపు దూసుకువెళుతోంది. ప్రస్తుతం ఈ పాట 214 మిలియన్ వ్యూస్ సాధించింది. ఈ పాటలో సామ్ చాలా సెక్సీగా కనిపించడమే కాకుండా అద్భుతంగా డ్యాన్స్ చేసిందని దేశవ్యాప్తంగా సినీ అభిమానులు, సినీ ప్రముఖులు, క్రిటిక్స్ కాంప్లిమెంట్లు ఇస్తున్నారు. తన సినిమాలన్నీ అభిమానులు మర్చిపోయారని, ఊ అంటావా పాటతోనే తెలుగు రాష్ట్రాలతోపాటు దేశమంతా తాను అభిమానులకు గుర్తుండిపోయానని సామ్ సంతోషం వ్యక్తం చేసింది. ఈ పాట ఇలాగే రికార్డు వ్యూస్ తో దూసుకుపోయి 300 మిలియన్ వ్యూస్ సాధిస్తుందని సమంత అభిమానులు కాన్ఫిడెంట్ గా ఉన్నారు.
