టాలీవుడ్ స్టార్ హీరోయిన్ సమంత ఈ మధ్య కాలంలో విలక్షణ పాత్రలతోనూ మెప్పిస్తోన్న సంగతి తెలిసిందే. ఓ బేబీ, యూటర్న్ వంటి విలక్షణ చిత్రాలతో ప్రేక్షకులతోపాటు విమర్శకుల మన్ననలు అందుకున్న సామ్…ఆ తర్వాత వెబ్ సిరీస్ లలోనూ అదరగొట్టింది. కొద్దిరోజుల క్రితం రిలీజైన ది ఫ్యామిలీ మ్యాన్-2 వెబ్ సిరీస్ లో రాజీ పాత్రలో సమంత నటనకు ఉత్తరాది ప్రేక్షకులు ఫిదా అయ్యారు. తమ మనోభావాలని సమంత దెబ్బతీసిందని తమిళ నేతలు కొందరు ఆగ్రహం వ్యక్తం చేసినా…ఆ వివాదం సద్దుమణిగింది.
ఈ నేపథ్యంలోనే రాజి పాత్రలో జీవించిన సామ్ కు ప్రతిష్టాత్మక అవార్డు దక్కింది. తాజాగా ప్రకటించిన “ఇండియన్ ఫిల్మ్ ఫెస్టివల్ ఆఫ్ మెల్బోర్న్ 2021” అవార్డ్స్ లో సమంత ఈ వెబ్ సిరీస్ లో నటనకుగాను బెస్ట్ పర్మార్మెన్స్ ఫిమేల్ అవార్డును దక్కించుకుంది. “ఫ్యామిలీ మ్యాన్-2” కు గాను మనోజ్ బాజ్‌పేయి ఉత్తమ నటుడి అవార్డును గెలుచుకున్నాడు. ఈ సిరీస్‌లో రాజీగా డీగ్లామర్ పాత్ర పోషించిన సమంత తన అద్భుతమైన నటనతో అందరినీ ఆకట్టుకుంది.
ఈ వెబ్ సిరీస్ ఉత్తమ నటుడు మనోజ్ బాజ్‌పేయి, ఉత్తమ నటి ప్రియమణి, ఉత్తమ సిరీస్, ఉత్తమ దర్శకుడు, ఉత్తమ డైలాగ్స్ వంటి విభాగాల కింద మొత్తం ఐదు ఫిల్మ్‌ఫేర్ అవార్డులను గెలుచుకుంది. ఇక, ఐఐఎఫ్ఎం 2021 అవార్డ్స్ లో “మీర్జాపూర్ సీజన్ 2” కూడా ఉత్తమ సిరీస్ అవార్డు దక్కించుకుంది. విలక్షణ నటుడు పంకజ్ త్రిపాఠికి ‘డైవర్సిటీ ఇన్ సినిమా’ పురస్కారం లభించింది. “సూరారై పొట్రు”లో అద్భుతమైన నటనకు సూర్య ఉత్తమ నటుడు అవార్డు (ఫీచర్) గెలుచుకున్నాడు.
