దక్షిణాది మెగా మల్టీస్టారర్ మూవీ, పాన్ ఇండియా చిత్రం ‘ఆర్ఆర్ఆర్’ మరికొద్ది గంటల్లో ప్రపంచవ్యాప్తంగా గ్రాండ్ రిలీజ్ కు రెడీగా ఉంది. ఇప్పటికే భారత్ తో పాటు పలు దేశాల్లో స్క్రీనింగ్ కు సిద్ధమైన ఈ చిత్రం రికార్డు థియేటర్లలో విడుదల కాబోతోంది. మెగా పవర్ స్టార్ రామ్ చరణ్ , యంగ్ టైగర్ జూనియర్ ఎన్టీఆర్ ల పాత్రలను జక్కన్న చెక్కిన తీరు ఎలా ఉంటుందో అన్న ఆసక్తి సినీ అభిమానులు, ఆ ఇద్దరు హీరోల అభిమానులను నిద్రపోనివ్వడం లేదు.
ఈ క్రమంలోనే చెర్రీ, తారక్ ఫ్యాన్స్ కు పూనకాలు వచ్చేలా ఆర్ఆర్ఆర్ చిత్రంపై ఫస్ట్ రివ్యూ బయటకు వచ్చేసింది. ఈ చిత్రంపై UK, UAE సెన్సార్ బోర్డ్ మెంబర్‌ ఉమైర్ సంధు ఫస్ట్ రివ్యూను తన ట్విటర్ ఖాతాలో రివీల్ చేశారు. రాజమౌళి చెక్కిన అద్భుత కళాఖండం ఆర్ఆర్ఆర్ అని సంధు ఆకాశానికెత్తేశాడు. ఈ సినిమాకు ఫైవ్ రేటింగ్ ను ఇచ్చిన సంధు…చెర్రీ, తారక్ ల నటనపై ప్రశంసలు కురిపించాడు.
సెన్సార్ బోర్డ్ నుండి ఆర్ఆర్ఆర్ మూవీ రివ్యూ ఇస్తున్నానని చెప్పిన సంధు… రామ్ చరణ్ అద్భుతమైన ఫామ్‌లో ఉన్నాడని కితాబిచ్చాడు. చరణ్, తారక్ లు అద్భుతంగా నటించారని, తారక్, చరణ్ ల కాంబినేషన్ లో వచ్చే సన్నివేశాలు అత్యద్భుతంగా ఉన్నాయని పొగడ్తలతో ముంచెత్తాడు. నెక్స్ట్ పాన్ ఇండియ స్టార్ తారక్ అని, ఈ సినిమాలో పర్ ఫార్మెన్స్ కు తారక్ కోసం నేషనల్ అవార్డ్ వెయిట్ చేస్తోందని కితాబిచ్చాడు. జూ.ఎన్టీఆర్ కెరీర్ ను ఇది మరో మలుపు తిప్పుతుందని ప్రశంసలు కురిపించాడు. అజయ్ దేవగన్ తన పాత్రలో ఒదిగిపోయాడని, ఆలియా భట్ అందంగా ఉందని చెప్పాడు.
భారతీయ చలనచిత్ర నిర్మాతలు భారీ సినిమాలను తెరకెక్కించవచ్చన్న ధైర్యాన్ని RRR సినిమా ఇస్తుందని సంధు అన్నాడు. ఈ సినిమాను మిస్ చేసుకోవద్దని, కచ్చితంగా బ్లాక్‌బస్టర్ అని రివ్యూ ఇచ్చేశాడు. ఆర్ఆర్ఆర్ మూవీ క్లాసిక్‌గా గుర్తుండిపోతుందని, రామ్ చరణ్, జూనియర్ ఎన్టీఆర్, అజయ్ దేవగన్ ల నటన ఓ రేంజ్ లో ఉండి ఎప్పటికీ గుర్తుండి పోతుందని చెప్పాడు. దీంతోపాటు, తన ఇన్‌స్టాగ్రామ్ లో ఆర్ఆర్ఆర్ సినిమాలో ఇప్పటి వరకూ చూడని కొన్ని గ్లింప్స్ లను కూడా సంధు పంచుకున్నాడు. ‘ఆర్ఆర్ఆర్’ పై సంధు ఇచ్చిన తాజా రివ్యూతోపాటు ఫస్ట్ రివ్యూ సోషల్ మీడియాలో వైరల్ అయింది.
