ఇండియాలో ప్ర‌స్తుతం మోస్ట్ అవైటెడ్ మూవీ అంటే ఆర్ఆర్ఆర్‌యే. ఈ సినిమా కోసం దేశ‌వ్యాప్తంగా ప్రేక్ష‌కులు ఎంత‌గా ఎదురు చూస్తున్నారో తెలిసిందే. వారి సుదీర్ఘ నిరీక్ష‌ణ‌కు తెర‌దించుతూ కొత్త ఏడాది ఆరంభంలోనే ఈ సినిమా థియేట‌ర్ల‌లోకి దిగాల్సింది.
ఈ నెల 7న ప్ర‌పంచ‌వ్యాప్తంగా భారీ స్థాయిలో సినిమా విడుద‌ల‌కు ఏర్పాట్లు జ‌రిగాయి. కానీ దేశంలో మ‌ళ్లీ క‌రోనా కేసులు పెరిగి, థియేట‌ర్లు మూత‌ప‌డుతుండ‌టంతో ఆర్ఆర్ఆర్‌ను మ‌రోసారి వాయిదా వేయ‌క త‌ప్ప‌లేదు. ఈ సినిమా కోసం వివిధ భాష‌ల్లో కొన్ని భారీ చిత్రాలు విడుద‌ల‌ను వాయిదా వేసుకున్నాయి.
అంద‌రూ ఈ చిత్రం కోసం లైన్ క్లియ‌ర్ చేస్తే.. ఇప్పుడు ఆ చిత్రం వేరే చిత్రాల‌కు లైన్ క్లియ‌ర్ చేసి వెళ్లిపోయింది. సంక్రాంతి పండ‌క్కి మ‌ధ్య‌లో చాలా త‌క్కువ టైం ఉన్నా స‌రే.. మంచి ఛాన్స్ దొరికింద‌ని హ‌డావుడిగా కొన్ని తెలుగు చిత్రాల‌ను పండుగ రేసులోకి తీసుకొచ్చేశారు.
ఆర్ఆర్ఆర్ స్టేట్మెంట్ వ‌చ్చిన కొన్ని గంట‌ల్లోనే రెండు కొత్త సినిమాలు సంక్రాంతి విడుద‌ల‌ను ఖ‌రారు చేసుకున్నాయి. అందులో ఒక‌టి సిద్ధు జొన్న‌ల‌గ‌డ్డ లీడ్ రోల్ చేసిన డీజే టిల్లు. విమ‌ల్ కృష్ణ అనే కొత్త ద‌ర్శ‌కుడితో సితార ఎంట‌ర్టైన్మెంట్స్ నిర్మించిన సినిమా ఇది.
కొన్ని రోజుల కింద‌టే ఫ‌స్ట్ కాపీ రెడీ అయినా.. ఎప్పుడు, ఎలా రిలీజ్ చేయాలో తెలియ‌ని సందిగ్ధంలో ఉన్న టీం హ‌డావుడిగా రిలీజ్ డేట్ ఇచ్చేసింది. మ‌రి కాసేప‌టికే హీరో మూవీ టీం లైన్లోకి వ‌చ్చింది. ఎంపీ గ‌ల్లా జ‌య‌దేవ్ త‌న‌యుడు, మ‌హేష్ బాబు మేన‌ల్లుడు గ‌ల్లా అశోక్ హీరోగా పరిచయం అవుతున్న చిత్ర‌మిది.
శ్రీరామ్ ఆదిత్య ద‌ర్శ‌క‌త్వంలో తెర‌కెక్కిన ఈ చిత్రం కూడా చాన్నాళ్ల ముందే పూర్త‌యింది. విడుద‌ల విష‌యంలో ఏ స‌మాచారం లేని ఈ చిత్రాన్ని ఉన్న‌ట్లుండి సంక్రాంతి రేసులోకి తెచ్చారు. మ‌రోవైపు దిల్ రాజు సోద‌రుడు శిరీష్ త‌న‌యుడు అశిష్ హీరోగా పరిచయం అవుతున్న రౌడీ బాయ్స్‌ను కూడా సంక్రాంతి బ‌రిలో నిల‌ప‌బోతున్న‌ట్లు వార్త‌లోస్తున్నాయి.
నాగార్జున సినిమా బంగార్రాజు ఉన్న‌ప్ప‌టికీ ఇంకో మూడు చిన్న సినిమాలు సంక్రాంతి రేసులోకి వ‌చ్చేశాయి. మ‌రోవైపు రాధేశ్యామ్ కూడా వాయిదా ప‌డ‌టం ఖాయమంటున్న‌ప్ప‌టికీ.. శ‌నివారం ఆ చిత్ర బృందం సంక్రాంతి విడుద‌ల‌ను ఖ‌రారు చేస్తూ పోస్ట‌ర్ రిలీజ్ చేయ‌డం గ‌మ‌నార్హం.
