మంత్రి రోజాపై కాంగ్రెస్ నేత, సినీ నిర్మాత బండ్ల గణేష్ సంచలన వ్యాఖ్యలు చేశారు. సీఎం రేవంత్ రెడ్డిపై రోజా చేసిన వ్యాఖ్యలకు బండ్ల కౌంటర్ ఇచ్చారు. రోజా ఒక ఐటం రాణి అని, డైమండ్ రాణి అని షాకింగ్ కామెంట్లు చేశారు. జగన్ యాక్సిడెంటల్ సీఎం అని, రేవంత్ రెడ్డి డైనమిక్ లీడర్ అని, పోరాడి సీఎం అయ్యారని గుర్తు చేశారు. రోజాలా చేపల పులుసు పెడితే కాంగ్రెస్ పార్టీలో పదవులు రావని చురకలంటించారు. తండ్రి చనిపోతే, వారసత్వంగా రేవంత్ రెడ్డి సీఎం కాలేదని, కష్టపడి ఆ పదవిని ఆయన దక్కించుకున్నారని అన్నారు.
త్వరలోనే రోజా మాజీ లీడర్ అవుతారని, అప్పటి నుంచి పగటి పూట జబర్దస్త్ షూటింగ్, రాత్రిపూట చేపల పులుసు వండడం తప్ప వేరే పనేమీ ఉండదని ఎద్దేవా చేశారు. సీఎం జగన్, సీఎం కేసీఆర్ లు గతంలో రోజా వండిన చేపల పులుసు తిని కృష్ణా జలాల పంపకాలలో తెలంగాణకు అన్యాయం చేశారని రేవంత్ చేసిన వ్యాఖ్యలపై రోజా స్పందించిన సంగతి తెలిసిందే. జగన్ తన ఇంటికి ఎప్పుడు వచ్చారో చెప్పాలని, రేవంత్ జాక్ పాట్ సీఎం అని రోజా ఎద్దేవా చేశారు. ఈ క్రమంలోనే రోజా కామెంట్లకు బండ్ల కౌంటర్ ఇచ్చారు.
ఇక, కేటీఆర్ మానసిక క్షోభకు గురవుతున్నారని, పగవాడికి కూడా అలాంటి పరిస్థితి రావద్దని బండ్ల అన్నారు. కేటీఆర్ చుట్టూ ఇగో వైఫైలా ఉంటుందని, కేటీఆర్ కు మరిన్ని కష్టాలు తప్పవని జోస్యం చెప్పారు. లోక్ సభ అభ్యర్థులు ఎవరో కేటీఆర్ చెప్పాలని బండ్ల డిమాండ్ చేశారు. కేసీఆర్ కొడుకు అనే ట్యాగ్ తప్ప కేటీఆర్ కి మరో గుర్తింపు లేదని, ఫోన్ రింగ్ అయినా కేటీఆర్ భయపడుతున్నారని విమర్శించారు.
