అవసరం లేని సందర్భాల్లో అనవసర వ్యాఖ్యలు చేయటం వల్ల లాభం కంటే నష్టమే ఎక్కువగా ఉంటుంది. ఆచితూచి మాట్లాడతారే తప్పించి అనవసరంగా మాట్లాడే తత్త్వం ఉండదనే పేరున్న బీజేపీ నేత ఈటల రాజేందర్ అనూహ్యంగా కాంగ్రెస్ పార్టీ మీదా.. టీపీసీసీ రథసారధి కమ్ ఫైర్ బ్రాండ్ రేవంత్ రెడ్డిపై చేసిన సంచలన ఆరోపణలు షాకింగ్ గా మారాయి. ఎందుకు మాట్లాడారో అర్థం కానట్లుగా ఉన్నట్లుండి సంచలన ఆరోపణను చేశారు ఈటల. మునుగోడు ఉప ఎన్నికల సందర్భంగా బీఆర్ఎస్ అధినేత కేసీఆర్ నుంచి కాంగ్రెస్ పార్టీకి రూ.25 కోట్లు అందాయని.. వాటిని తీసుకొని ఆ ఎన్నికల్లో ఖర్చు చేశారంటూ మండిపడ్డారు. మునుగోడు ఎన్నికల్లో కాంగ్రెస్ ఖర్చు చేసి ప్రతి రూపాయి బీఆర్ఎస్ దేనని ఈటల మండిపడ్డారు.
ఈ సంచలన ఆరోపణలపై వెంటనే స్పందించారు రేవంత్ రెడ్డి. తనకు కానీ తన పార్టీకి కానీ బీఆర్ఎస్ అధినేత కేసీఆర్ నుంచి ఒక్కటంటే ఒక్క రూపాయి తాను తీసుకున్న నిరూపించాలని సవాలు విసిరారు. అక్కడితో ఆగని రేవంత్.. బీజేపీ నేతలు తమ కార్యక్రమాలకు వేదికగా చేసుకునే చార్మినార్ వద్ద భాగ్యలక్ష్మీ ఆలయానికి తడిబట్టలతో వస్తానని.. ప్రమాణం చేస్తానని.. మరి ఈటల కూడా వస్తారా? అంటూ తీవ్రస్థాయిలో విరుచుకుపడ్డారు. భాగ్యలక్ష్మీ ఆలయానికే కాదు.. ఏ గుడికి రమ్మన్నా వచ్చి ప్రమాణం చేస్తానన్న ఘాటు రిప్లైతో ఈటల సైడ్ నుంచి మౌనమే సమాధానమైంది.
ఏ ఉద్దేశంతో ఈటల ఈ తరహా ఆరోపణ చేశారో కానీ.. ఈ ఎపిసోడ్ లో రేవంత్ కే లాభం చేకూరేలా మారిందంటున్నారు. తమకు పాతిక కోట్ల అవసరం ఏముందన్న రేవంత్.. మనో నాలుగు నెలల్లో కేసీఆర్ నుంచి అధికారాన్నే గుంజుకుంటామని ఘాటు వ్యాఖ్యలు చేశారు. ఈటల చేసిన ఆరోపణలకు సమాధానంగా తాను ఆదివారం సాయంత్రం ఆరు గంటలకు భాగ్యలక్ష్మి ఆలయానికి వచ్చి ప్రమాణం చేస్తానని వ్యాఖ్యానించారు. అన్నట్లుగానే ఆయన ఆలయానికి వచ్చి ప్రమాణం చేశారు.
రాజీ నా రక్తంలో లేదు.. భయం నా ఒంట్లో లేదు
“రాజీ నా రక్తంలో లేదు.. భయం నా ఒంట్లో లేదు..ఆఖరి రక్తపు బొట్టు వరకు నేను పోరాటం చేస్తా..అమ్మవారిపై ప్రమాణం చేసి చెబుతున్నా…మునుగోడు ఎన్నికల్లో కేసీఆర్, టీఆర్ఎస్ నుంచి డబ్బులు తీసుకుని ఉంటే… నా కుటుంబం సర్వ నాశనమైపోతుంది” అని టీపీసీసీ అధ్యక్షుడు రేవంత్ రెడ్డి భావోద్వేగంగా వ్యాఖ్యానించారు.
నిన్న బీజేపీ ఎమ్మెల్యే ఈటెల రాజేందర్ మునుగోడు ఎన్నికల్లో కాంగ్రెస్ పార్టీకి కేసీఆర్ రూ. 25 కోట్లు ఇచ్చినట్లు ఆరోపణలు చేశారు. దానికి ప్రతిగా బీజేపీ విశ్వసించే చార్మినార్ భాగ్యలక్ష్మి అమ్మవారి ఆలయంలో శనివారం సాయంత్రం 6 గంటలకు వచ్చి ప్రమాణం చేస్తా. లేకపోతే ఏ ఆలయంలో నైనా తడి బట్టలతో ప్రమాణం చేయడానికి సిద్ధంగా ఉన్నా. నాపై చేసిన ఆరోపణలను ఈటల నిరూపించడానికి సిద్ధమా? అని రేవంత్ సవాల్ విసిరారు. ఆ సవాలు కట్టుడి ఈ రోజు చార్మినార్ భాగ్యలక్ష్మీ ఆలయంలో అమ్మవారిని దర్శించుకొని ప్రమాణం చేశారు. తర్వాత మీడియాతో మాట్లాడారు. ఈటలను దుయ్యబడుతూ రేవంత్‌రెడ్డి భావోద్వేగానికి గురయ్యారు.
భాగ్యలక్ష్మి ఆలయంలో ఆత్మసాక్షిగా ప్రమాణం చేశానని తెలిపారు. తాను హిందువునని, అమ్మవారి నమ్ముతానని అన్నారు. అందుకే ఈటల చేసిన ఆరోపణలను నిరూపించుకోవడానికి భాగ్యలక్ష్మి అమ్మవారి ఆలయానికి వచ్చానని చెప్పారు. తాను కేసీఆర్,టీఆర్ఎస్ నేతల దగ్గర ఒక్కరూపాయి కూడా తీసుకోలేదన్నారు.
“నన్ను అమ్ముడుపోయారని అంటావా? కేసీర్ సర్వం ధరపోసినా నన్ను కొనలేరు..ఇది చిల్లర రాజకీయం కాదు.. పోరాటం. నా నిజాయితీని శంకిస్తే మంచిది కాదు..రేవంత్ రెడ్డిని కొనేవాడు ఇంకా పుట్టలేదు..నేను ఎవరికీ భయపడను.. నిటారుగా నిలబడి కొట్లాడుతా..నా జీవితంలో అన్నీ ఉన్నాయి.. కేసీఆర్ సర్వం ధారపోసినా నన్ను కొనలేరు. బిడ్డ పెళ్లికి ఖైదీలా వచ్చిపోతే నా ఆవేదన తెలిసేది. రేవంత్‌రెడ్డిని కొనేవాడు ఇంకా పుట్టలేదు. కేసీఆర్‌ను గద్దెదించడమే నా ఏకైక లక్ష్యం. చివరి రక్తపు బోట్టు వరకు, ఒంట్లో భయం లేకుండా కేసీఆర్ తో పోరాడుతా” అని రేవంత్ రెడ్డి స్పష్టం చేశారు.
మునుగోడు ఎన్నికల్లో ఏం జరిగిందో అందరికీ తెలుసన్నారు. మునుగోడులో బీఆర్ఎస్, బీజేపీ వందల కోట్లు ఖర్చు చేశాయని ఆరోపించారు. పాల్వాయి సేవలను గుర్తించి మునుగోడు ఎన్నికల్లో స్రవంతికి పార్టీ టికెట్ కేటాయించింది. ఎన్నికల సమయంలో 300 కోట్ల మద్యం అమ్మకాలు జరిగాయి. ఒక్క రూపాయి, చుక్క మందు పంపిణీ చేయకుండా ఎన్నికల్లో ఓట్లు అడుగుతామని యాదగిరిగుట్టలో ప్రమాణం చేయాలని స్రవంతి సవాల్ విసిరింది. మునుగోడులో నిజాయితీగా పనిచేసి స్రవంతిని అభ్యర్థిగా బరిలో నిలిపి ఒక్క నోటు ఇవ్వకుండా ఓటు అడిగామని తెలిపారు. 25 వేల మంది ఓటర్లు స్రవంతి పక్కన నిలబడ్డారు అన్నారు.
మునుగోడులో సీఎం కేసీఆర్ తో కాంగ్రెస్ ఎలాంటి లాలూచీ పడలేదని రేవంత్ రెడ్డి స్పష్టం చేశారు. ఈటెల రాజేందర్ వ్యవహార శైలి నేను గమనిస్తున్న. కేసీఆర్ కాంగ్రెస్ కు 25కోట్లు సాయం చేశారని ఈటెల ఆరోపించారు. ఇది ఆరోపణ కాదు.. ఆధారాలు లేవని ఈటెల అన్నారు. ఆధారాలు లేనపుడు అందరూ దేవుడిని నమ్ముతారు అని వ్యాఖ్యానించారు. కేసీఆర్ నుంచి ఒక్క రూపాయి కూడా తీసుకోలేదని ప్రకటించారు. ఎమ్మెల్యే ఈటల రాజేందర్ ఆరోపణలు అవాస్తవమని రేవంత్ కొట్టిపారేశారు.
‘కేసీఆర్, కేటీఆర్ దోపీడీని బయటపెట్టినందుకు నన్ను జైల్లో పెట్టారు. జైల్లో నిద్ర లేని రాత్రులు గడిపాను. కేసీఆర్‌ను ఎదుర్కొని.. ధైర్యంగా నిలబడ్డా. నోటీసులు ఇవ్వగానే ఎవరికో నేను లొంగిపోలేదు. నాపై, పార్టీపై ఆరోపణలు చేస్తారా?.. ఈటల రాజేందర్.. ఆలోచించి మాట్లాడాలి. రాజకీయం కోసం మాలాంటి వారిపై ఆరోపణలు చేస్తావా? నిన్ను అసెంబ్లీలో కేసీఆర్ అభినందించి ఉండవచ్చు..నా పోరాటానికి నీవు సజీవ సాక్ష్యం కదా రాజేంద్రా. రాజేంద్రా.. నా కళ్ళలోకి చూసి మాట్లాడు… ఆలోచించి మాట్లాడు..ఈటలపై కేసీఆర్ కక్ష కట్టినపుడు సానుభూతి చూపించాం. ఇది రాజకీయం కాదు.. నా మనోవేదన. అసత్య ఆరోపణలు మంచివి కాదు. కేసీఆర్‌ను ప్రశ్నించే గొంతులకు ఇదేనా నువ్విచ్చే గౌరవం ఇదా?’’ అని రేవంత్ ప్రశ్నించారు. నాపై ఇష్టారీతిన మాట్లాడి, తెలంగాణ సమాజం ముందు తలదించుకునే పరిస్థితి తెచ్చుకోవద్దని హెచ్చరించారు. మున్ముందు ఎవరిని ఎవరు గద్దె దించుతారో తెలుస్తుందన్నారు. రాజేంద్రా.. అందరితో మాట్లాడినట్లు నాతో యథాలాపంగా మాట్లాడవద్దన్నారు. నేను ఎవ్వడికి బయపడను, ప్రాణం ఉన్నంత వరకు పోరాడుతా అని రేవంత్ ఉద్వేగంగా మాట్లాడారు. తెలంగాణ సమాజం కోసం కొట్లాడే వ్యక్తిగా నాపై బురదజల్లడం మంచిది కాదని హిత‌వు ప‌లికారు. ఇదివరకే కేసీఆర్‌తో రాజకీయపరమైన యుద్ధాన్ని కొనసాగించేటప్పుడు ఈటల రాజేందర్ ఎక్కడ ఉన్నారని రేవంత్ రెడ్డి ప్రశ్నించారు. ఇదే ఈటల రాజేందర్ అప్పుడు కేసీఆర్ పంచన ఉండేవాడని గుర్తు చేశారు. నువు చేరిన పార్టీలో నీ గుర్తింపు కోసం, కుర్చీ కోసం కక్కుర్తిపడి కేసీఆర్ పైన పోరాడుతున్న నా మీద అబద్దపు ప్రచారం చేస్తావా అని నిలదీశారు. తన జీవితం ఏమీ వడ్డించిన విస్తరీ కాదని, కేసీఆర్ కు వ్యతిరేకంగా పోరాటడం కోసం తొమ్మిదేళ్లు నిద్రలేని రాత్రులు గడుపుతున్నానని చెప్పారు. కేసీఆర్ దండుపాళ్యం ముఠాలు తన స్థైర్యాన్ని దెబ్బతీయాలని చూసినా కొట్లాడుతూనే ఉన్నానని చెప్పారు. ప్రశ్నించే గొంతుల మీద ఈటెల దాడి చేస్తున్నారని, ఆయన వైఖరి తెలంగాణ సమాజానికి నష్టమా కాదా ఆలోచించుకోవాలన్నారు రేవంత్ రెడ్డి.
