మార్గదర్శి చిట్ ఫండ్స్ ప్రైవేట్ లిమిటెడ్ వ్యవహారంలో అవకతవకలు జరిగాయంటూ ఆ సంస్థ ఛైర్మన్, ఈనాడు గ్రూప్ అధినేత రామోజీరావు, ఆయన కోడలు శైలజా కిరణ్ పై ఆరోపణలు వస్తున్న సంగతి తెలిసిందే. మార్గదర్శి చిట్ ఫండ్స్ లో నిబంధనలకు విరుద్ధంగా చిట్స్ వేశారని, ఆ కంపెనీలో అక్రమాలు అవకతవకలు జరిగాయని ఆరోపణలు వచ్చాయి. ఈ నేపథ్యంలోనే రామోజీరావుతో పాటు ఆయన కోడలు శైలజా కిరణ్ కు ఏపీ సిఐడి అధికారులు కొద్దిరోజుల క్రితం సెక్షన్ 160 ప్రకారం నోటీసులు జారీ చేశారు.
మోసం చేయడం, డిపాజిట్లను మ్యూచువల్ ఫండ్స్ లోకి దారి మళ్ళించడం, క్యాపిటల్ మార్కెట్లో నష్టాలు, చిట్ ఫండ్ బిజినెస్ మరియు రిజర్వ్ బ్యాంక్ ఆఫ్ ఇండియా నిబంధనలు ఉల్లంఘించడం వంటి ఆరోపణలపై ఈ నోటీసులను అధికారులు జారీ చేశారు. ఈ క్రమంలోనే ఏప్రిల్ 3 లేదా 6 తేదీల్లో వారి నివాసం లేదా కార్యాలయంలో అందుబాటులో ఉండాలని సిఐడి అధికారులు కోరారు. ఈ నేపథ్యంలోనే తాజాగా నేడు జూబ్లీహిల్స్ లోని శైలజా కిరణ్ నివాసానికి ఏపీ సీఐడీ అధికారుల బృందం విచారణ జరిపేందుకు వచ్చింది.
దాదాపు 200 మంది అధికారులు విచారణ జరిపేందుకు వచ్చారు. విచారణకు హాజరయ్యేందుకు రామోజీ రావు కూడా శైలజా కిరణ్ ఇంటికి వచ్చారు. దీంతో, భారీ భద్రత నడుమ అధికారులు విచారణ జరుపుతున్నారు. ఈ కేసులో ఏ1గా మార్గదర్శి చిట్ ఫండ్స్ ప్రైవేట్ లిమిటెడ్ చైర్మన్ చెరుకూరి రామోజీరావు, ఏ2గా శైలజా కిరణ్ లను అధికారులు పేర్కొన్నారు. దాంతోపాటు మార్గదర్శి చిట్ ఫండ్ బ్రాంచ్ మేనేజర్లు పలువురిపై కూడా కేసులు నమోదు చేశారు.
కొద్ది రోజుల ఆంధ్రప్రదేశ్‌లో మార్గదర్శి చిట్ ఫండ్స్ కార్యాలయాలు, మేనేజర్ల ఇళ్లపై స్టాంప్స్ అండ్ రిజిస్ట్రేషన్ శాఖ సోదాలు చేసింది.ఏపీ ప్రొటెక్షన్ ఆఫ్ డిపాజిటర్స్ ఫైనాన్షియల్ ఎస్టాబ్లిష్‌మెంట్ యాక్ట్, 1999, చిట్ ఫండ్ యాక్ట్ 1982లను ఉల్లంఘించిన ఆరోపణలపై మార్గదర్శి చిట్ ఫండ్స్ ప్రైవేట్ లిమిటెడ్ సంస్థపై ఏపీ సీఐడీ కేసు నమోదు చేసింది. ఆంధ్రప్రదేశ్‌లోని మంగళగిరిలోని సీఐడీ పోలీస్ స్టేషన్‌లో కేసు నమోదైంది. మార్చి 12న ఆంధ్రప్రదేశ్‌లోని మార్గదర్శి శాఖలపై దాడులు నిర్వహించిన అధికారులు నలుగురిని అరెస్టు చేశారు.
