యంగ్ టైగర్ ఎన్టీఆర్, మెగా పవర్ స్టార్ రామ్ చరణ్ తేజ్ ల కాంబోలో దర్శక ధీరుడు ‘మహారాజ’మౌళి తెరకెక్కించిన ‘ఆర్ఆర్ఆర్’ చిత్రం బాక్సాఫీస్ దగ్గర కలెక్షన్ల మోత మోగించిన సంగతి తెలిసిందే. తారక్, చెర్రీలు నువ్వా నేనా అన్నట్లు పోటీపడి నటించడం…రాజమౌళి మరోసారి తన మార్క్ డైరెక్షన్ తో మెప్పించడంతో ఈ చిత్రం అమెరికా సహా ఓవర్సీస్ లోని ప్రేక్షకులనూ ఆకట్టుకుంది. ఈ సినిమాతో చెర్రీ, తారక్ లు పాన్ ఇండియా హీరోలుగా మారిపోయారు.
ముఖ్యంగా చెర్రీ నటనకు నార్త్ ఆడియన్స్ తో పాటు హాలీవుడ్ ప్రేక్షకులు కూడా ఫిదా అయ్యారు. ముఖ్యంగా ఆ చిత్రంలో చరణ్ ఇంట్రడక్షన్ సీన్ తో పాటు క్లైమాక్స్ సీన్ లలో చెర్రీ నటన అద్భుతంగా ఉందని అందరూ కితాబిస్తున్నారు. ఆచార్య ఫలితం చెర్రీని నిరాశపరిచినా….రామరాజు పాత్ర మాత్రం చెర్రీకి మంచి పేరు తెచ్చిపెట్టింది. ఈ చిత్రంలో చెర్రీ నటనకు ప్రముఖ న్యూస్ వెబ్ సైట్ ‘ఇన్ సైడర్’ కరస్పాండెంట్ కిర్ స్టెన్ కూడా ముగ్ధురాలయ్యారట. ఈ చిత్రంలో చరణ్ నటన చూసి ఆయను తాను ఫ్యాన్ గా మారిపోయానని స్వయంగా ఆమె ట్వీట్ చేశారు.
అంతేకాదు, తన కొత్త క్రష్ చెర్రీనే అని కూడా ఆమె చెప్పడంతో అమెరికాలోని అమ్మాయిలకు రామ్ చరణ్ కలల రాకుమారుడిగా మారిపోయాడట. ఈ క్రమంలోనే చెర్రీ అభిమానులంతా నెట్ ఫ్లిక్స్ లో స్ట్రీమ్ అవుతున్న ఆర్ఆర్ఆర్ సినిమా నుంచి చరణ్ స్క్రీన్ షాట్స్ తీసి మరీ సోషల్ మీడియాలో షేర్ చేస్తున్నారట. దీంతో, కోలీవుడ్ హీరో ధనుష్ మాదిరిగానే రామ్ చరణ్ కూడా అర్జెంటుగా హాలీవుడ్ లో పాగా వేయాలని, లాస్ ఏంజెలిస్ లో ఓ ఏజెంట్ ను ఏర్పాటు చేసుకొని హాలీవుడ్ సినిమా ఆఫర్లు పట్టేయాలని కొందరు అభిమానులు ట్వీట్ చేస్తున్నారు.
అయితే, ఆర్ఆర్ఆర్ చిత్రం షూటింగ్ లో ఉండగానే హాలీవుడ్ లో రూపొందుతున్న ఒక పాపులర్ వెబ్ సిరీస్ లో నటించే చాన్స్ చెర్రీకి వచ్చిందని టాక్. ఓ బడా నిర్మాణ సంస్థవారు తెలుగులో రూపొందించనున్న ఈ వెబ్ సిరీస్ కోసం ముందుగా ఒక బాలీవుడ్ స్టార్ హీరోను తీసుకోవాలని అనుకున్నారట. అయితే ‘ఆర్ఆర్ఆర్’ తర్వాత రామ్ చరణ్ ను తీసుకోవాలనే ఉద్దేశంతో చర్చలు జరుపుతున్నట్టుగా తెలుస్తోంది. ఇప్పటికే కథ కూడా నచ్చిన చరణ్ గ్రీన్ సిగ్నల్ ఇచ్చినట్టు టాలీవుడ్ టాక్.
