టాలీవుడ్ దర్శకధీరుడు రాజమౌళి దర్శకత్వంలో తెరకెక్కుతోన్న పాన్ ఇండియా మూవీ ‘ఆర్ఆర్ఆర్’పై భారీ అంచనాలున్న సంగతి తెలిసిందే. బాహుబలి తర్వాత రాజమౌళి చెక్కుతోన్న ఈ పిరియాడికల్ ఫిక్షన్ మూవీ కోసం దేశవ్యాప్తంగా సినీ అభిమానులు ఆసక్తిగా ఎదురుచూస్తున్నారు. మెగా పవర్ స్టార్ రామ్ చరణ్, యంగ్ టైగర్ జూనియర్ ఎన్టీఆర్ లు నటించిన ఈ చిత్రం నుంచి ఇటీవల విడుదలైన ట్రైలర్ యూట్యూబ్ లో దుమ్మురేపుతోంది.
జనవరి 7న సినిమా విడుదల కాబోతోన్న సందర్భంగా ఈ చిత్రం ప్రమోషన్స్ జోరు పెంచాడు జక్కన్న. తాజాగా విడుదలైన ట్రైలర్ లో ప్రతీ సీన్ గూస్ బంప్స్ తెప్పించేలా ఉంది. అందుకే, ఈ ట్రైలర్ విడుదలైన కొద్ది గంటల్లోనే రికార్డు స్థాయిలో వ్యూస్ వచ్చాయి. ఒక్క తెలుగులోనే ఇప్ప‌టివరకు ఈ ట్రైలర్కు 21.71 మిలియ‌న్ల‌కు పైగా వ్యూస్ వ‌చ్చాయంటే ఆర్ఆర్ఆర్ సినిమా ఏ రేంజ్ లో ఉంటుందో అర్థం చేసుకోవచ్చు.
ఈ నేపథ్యంలోనే ఈ వ్యూస్ పై రాజమౌళి స్పందించారు. ఈ ట్రైలర్కు భారీ స్పంద‌న రావడంపై జక్కన్న హ‌ర్షం వ్య‌క్తం చేశారు. అన్ని ప్రాంతాల నుంచి ఆర్ఆర్ఆర్ ట్రైలర్కు విపరీతమైన స్పంద‌న వస్తోందని, దీంతో, తమ టీమ్ అంతా చాలా ఎంజాయ్ చేస్తోంద‌ని రాజమౌళి అన్నారు. ఈ భారీ స్పంద‌న చూసి ఏం మాట్లాడాలో కూడా అర్థం కావడం లేదన్నారు. ఈ ట్రైలర్ ను వీక్షించిన వారంద‌రికీ రాజమౌళి కృతజ్ఞతలు తెలిపారు.
