ఆంధ్ర‌ప్ర‌దేశ్‌లో వైఎస్సార్ కాంగ్రెస్ పార్టీ అధికారంలో ఉండ‌గా.. జ‌న‌సేన అధినేత పవన్ క‌ళ్యాణ్‌ను జగన్ అండ్ కో ఎంత‌గా ఇబ్బంది పెట్టారో, ఎన్నెన్ని మాట‌ల‌న్నారో కొత్త‌గా చెప్పాల్సిన ప‌ని లేదు. ఐతే పవన్ రాజ‌కీయాల్లో ఉన్నాడు కాబ‌ట్టి ఇలా టార్గెట్ చేయ‌డాన్ని ఎంతో కొంత స‌మ‌ర్థించుకోవ‌చ్చు. కానీ త‌న‌ను ఎంతో గౌర‌వించిన మెగాస్టార్ చిరంజీవి విష‌యంలో జగన్ వ్య‌వ‌హ‌రించిన తీరే మెగా అభిమానుల‌కు అస్స‌లు రుచించ‌లేదు.
టికెట్ల ధ‌రల వివాదం టైంలో చిరును త‌న ద‌గ్గ‌రికి ర‌ప్పించుకుని రేట్ల పెంపు కోసం అడుక్కునేలా చేయ‌డం.. చిరు దండం పెడుతున్నా జగన్ వారించ‌క‌పోవ‌డం, ప్ర‌తిన‌మ‌స్కారం పెట్ట‌క‌పోవ‌డం మెగా అభిమానుల‌ను తీవ్ర ఆగ్ర‌హానికి గురి చేసింది. క‌ట్ చేస్తే ఏపీ ఎన్నిక‌ల్లో వైసీపీ ఘోర ప‌రాజ‌యం పాలైంది. అదే స‌మ‌యంలో జ‌న‌సేన తిరుగులేని విజ‌యం సాధించింది. జగన్ ఓట‌మిలో పవన్ ఎంత కీల‌క పాత్ర పోషించాడో తెలిసిందే.
ఈ నేప‌థ్యంలో ఎన్నిక‌ల ఫ‌లితాలు వ‌చ్చాక ఒక నానుడి సోష‌ల్ మీడియాలో వైర‌ల్ అయింది. అన్న దండం పెడితే త‌మ్ముడు పిండం పెట్టాడు.. ఇదే ఆ నానుడి. దీన్ని పీఆర్వో ట‌ర్న్డ్ ప్రొడ్యూస‌ర్ ఎస్కేఎన్.. స్టేజ్ మీద ప్ర‌స్తావించి జగన్, ఆయ‌న పార్టీ మీద కౌంట‌ర్లు వేయ‌డం విశేషం. ఏపీలో కూట‌మి ఘ‌న‌విజ‌యం నేప‌థ్యంలో పీపుల్స్ మీడియా అధినేత టీజీ విశ్వ ప్ర‌సాద్ ఇండ‌స్ట్రీ జ‌నాలు, మీడియా వాళ్ల‌కు పెద్ద పార్టీ ఇచ్చారు ఆదివారం. టాలీవుడ్లో ఇలాంటి అఫీషియ‌ల్ ప్రోగ్రాం ఒక‌టి ఇంత‌కుముందెన్న‌డూ జ‌ర‌గ‌లేదు.
ఈ వేడుక‌కు అతిథిగా హాజ‌రైన ఎస్కేఎన్.. అన్న దండం పెడితే త‌మ్ముడు పిండం పెట్టాడు అనే కామెంట్‌తో ఆడిటోరియాన్ని హోరెత్తించాడు. అంతే కాక న‌మ‌స్కారానికి ప్ర‌తి న‌మ‌స్కారం సంస్కారం అని.. ఆ సంస్కారం తెలియ‌ని వాళ్ల‌కు జ‌నం ఇచ్చిన ఫ‌లితం ఎలాంటిదో అంద‌రూ చూశార‌ని మ‌రో షార్ప్ కామెంట్ చేశాడు ఎస్కేఎన్. ఈ వేడుక‌ల్లో చాలామంది మాట్లాడినా.. ఎస్కేఎన్ స్పీచే హైలైట్ అయింది.
