మాస్ కా బాప్, నందమూరి నటసింహం బాలకృష్ణ హోస్ట్ గా వ్యవహరిస్తున్న అన్ స్టాపబుల్ విత్ ఎన్బికె కార్యక్రమం రెండో సీజన్ కూడా దిగ్విజయంగా కొనసాగుతున్న సంగతి తెలిసిందే. ఏపీ మాజీ సీఎం టిడిపి అధినేత నారా చంద్రబాబునాయుడుతో తొలి ఎపిసోడ్ ను మొదలుపెట్టిన బాలయ్య ఆ తర్వాత యంగ్ హీరోలు విశ్వక్సేన్, సిద్దు జొన్నలగడ్డలతో రెండో ఎపిసోడ్, శర్వానంద్, అడవి శేషులతో మూడో ఎపిసోడ్లను రక్తి కట్టించారు.
ఇక, నాలుగో ఎపిసోడ్లో తన క్లాస్మేట్స్, స్నేహితులు అయిన ఏపీ మాజీ సీఎం నల్లారి కిరణ్ కుమార్ రెడ్డి, టిఆర్ఎస్ రాజ్యసభ సభ్యుడు సురేష్ రెడ్డి, సీనియర్ నటి రాధికలతో గుర్తుకొస్తున్నాయి అంటూ తన ఆటోగ్రాఫ్ స్వీట్ మెమోరీస్ ను బాలయ్య నెమరేసుకున్నారు. ఈ సీజన్ 5వ ఎపిసోడ్ కు గెస్టులుగా ప్రముఖ దర్శకనిర్మాత కె రాఘవేంద్ర రావు, ఎ.కోదండరామిరెడ్డిలతోపాటు ప్రముఖ నిర్మాతలు అల్లు అరవింద్, సురేష్ బాబులను బాలయ్య ఆహ్వానించి వారితో తన అనుబంధాన్ని గుర్తు చేసుకున్నారు.
దీంతో, ఈ షో 6వ ఎపిసోడ్ కు గెస్ట్ గా ఎవరు రాబోతున్నారు అన్నదానిపై ఉత్కంఠ ఏర్పడింది. పాన్ ఇండియా హీరో, రెబల్ స్టార్ ప్రభాస్, హీరో గోపీ చంద్ లు ఆరో ఎపిసోడ్ కు రాబోతున్నారని ఆహా టీం విడుదల చేసిన ప్రోమో వైరల్ గా మారింది. తన స్నేహితుడు, హీరో గోపీచంద్ తో కలిసి వచ్చిన ప్రభాస్… బాలయ్యతో సందడి చేసినట్లుగా తెలుస్తోంది.
ఈ క్రమంలోనే తాజాగా ఆ ఎపిసోడ్ షూట్ చేస్తున్న సెట్ నుంచి ప్రభాస్, బాలయ్య, గోపీచంద్ ల ఫొటోలను ఆహా తన ట్విట్టర్ ఖాతాలో షేర్ చేసింది. ఆ ముగ్గురూ ఒకే స్టేజ్, ఫ్రేమ్ లోకి వచ్చిన విషయాన్ని తాము ఇంకా నమ్మలేకపోతున్నామంటూ ట్వీట్ చేసింది. ‘మీరు ఎన్నడూ చూడని ఒక కొత్త యాంగిల్ మీకు చూపించే మాసివ్ ఎపిసోడ్ ఇది. త్వరలో మీ ముందుకు వస్తుంది’ అంటూ ఆహా టీం విడుదల చేసిన ఫొటోలు ఆ ఎపిసోడ్ పై అంచనాలు మరింత పెంచాయి. ప్రస్తుతం ఆ ఫొటోలు సోషల్ మీడియాలో వైరల్ అవుతున్నాయి.
