మెగాస్టార్ చిరంజీవి, దర్శకుడు మోహన్ రాజాల కాంబోలో తెరకెక్కిన చిత్రం గాడ్ ఫాదర్ . అక్టోబర్ 5న ప్రపంచవ్యాప్తంగా ఈ సినిమా భారీ స్థాయిలో విడుదలకు సిద్ధమవుతోంది. ఈ చిత్రం నుంచి విడుదలైన ట్రైలర్, సాంగ్స్ కు విపరీతమైన స్పందన వస్తోంది. ఆ ట్రైలర్, సాంగ్స్ చిత్రంపై ఉన్న అంచనాలను మరింత పెంచాయి. చిరుతో పాటు నయనతార, సత్యదేవ్, బాలీవుడ్ హీరో సల్మాన్ ఖాన్ కీలక పాత్రలో నటించిన ఈ చిత్రంపై మెగా ఫ్యాన్స్ భారీ అంచనాలు పెట్టుకున్నారు.
అయితే, రేపు చిత్రం విడుదల కాబోతున్న సందర్భంగా తాజాగా ఓ పుకారు టాలీవుడ్ లో షికారు చేస్తోంది. ఈ సినిమాలో పవన్ కళ్యాణ్ కూడా ఒక గెస్ట్ రోల్ చేశారని, ఫ్యాన్స్ కు సర్ప్రైజ్ ఇవ్వాలన్న ఉద్దేశంతో ఆ విషయాన్ని బయట పెట్టలేదని తెలుస్తోంది. మలయాళ చిత్రం ‘లూసిఫర్’లో హీరో టోవినో థామస్ పోషించిన పాత్రను తెలుగులో పవన్ కళ్యాణ్ పోషించారని పుకార్లు వినిపిస్తున్నాయి. పెద్దాయన అసలు రాజకీయ వారసుడు ఇతనే అంటూ అమెరికా నుంచి వచ్చిన టోవినో థామస్ అదిరిపోయే స్పీచ్ ఇస్తాడు.
అందుకే ఈ పాత్రలో పవన్ నటించారని, గాడ్ ఫాదర్ లో పవన్ స్పీచ్ ఈ సినిమాకి హైలైట్ గా నిలుస్తుందని టాక్ వస్తోంది. ‘‘ఇదంతా నా అన్నయ్య చెప్తేనే చేశాను…అన్న లేనిదే నేను లేను’’ అని పవన్ చెప్పే డైలాగ్ థియేటర్లో మెగా ఫ్యాన్స్ కు పూనకాలు తెప్పిస్తుందని ఒక పుకారు వినిపిస్తోంది. మలయాళంలో ఆ పాత్ర నిడివి 30 నిమిషాల వరకు ఉండగా దాన్ని పవన్ కోసం 20 నిమిషాలకు కుదించారని తెలుస్తోంది.
అయితే ఈ సినిమాలో పవన్ నటిస్తున్నట్టుగా అధికారికంగా చిత్ర యూనిట్ నుంచి ఎటువంటి ప్రకటన రాలేదు. కానీ, గాడ్ ఫాదర్ షూటింగ్ సమయంలో మాత్రం సెట్స్ లో ఉన్న చిరంజీవితో పవన్ కళ్యాణ్ భేటీ కావడం ఈ పుకార్లకు ఊతమిస్తోంది. చేతిలో ఉన్న సినిమాలపరంగా, రాజకీయాలపరంగా పవన్ ఫుల్ బిజీగా ఉన్న సమయంలో ఆ షూటింగ్ సెట్ కి పవన్ ఊరికే రాలేదని, ఈ చిత్రంలో నటించేందుకు వచ్చారని సోషల్ మీడియాలో పుకార్లు వస్తున్నాయి. మరి ఈ సినిమాలో పవన్ నటించారో లేదో తెలియాలంటే మరికొద్ది గంటలు వేచి చూడక తప్పదు. కాగా, తాజాగా విడుదలై గాడ్ ఫాదర్ టైటిల్ సాంగ్ యూట్యూబ్ లో దుమ్మురేపుతోంది.
