ఢిల్లీలో ఈ రోజు జరిగిన ఎన్డీయే పార్లమెంటరీ కమిటీ మీటింగ్ కు టీడీసీ అధినేత చంద్రబాబుతోపాటు, జనసేన అధినేత పవన్ కల్యాణ్ కూడా హాజరైన సంగతి తెలిసిందే. ఈ క్రమంలోనే ఎన్డీఏ లోక్ సభా పక్ష నేతగా, ఎన్డీయే కూటమి నేతగా మోడీ ని ఏకగ్రీవంగా ఎన్నుకున్నారు. ఈ సందర్భంగా ప్రసంగించిన పవన్…మోడీపై ప్రశంసల జల్లు కురిపించారు. కశ్మీర్ నుంచి కన్యాకుమారి వరకు దేశం మొత్తానికి మోడీ ఒక స్ఫూర్తి అని పవన్ కొనియాడారు.
మోడీ స్ఫూర్తితోనే ఏపీలో ఎన్డీఏ కూటమి ప్రభంజనం సృష్టించిందని పవన్ అన్నారు. మోడీ దిశానిర్దేశంతో రాష్ట్రంలో 91 శాతానికి పైగా సీట్లు గెలుచుకోగలిగామని వెల్లడించారు. ఎన్డీయే పక్ష నేతగా మోడీకి సంపూర్ణ మద్దతు ప్రకటిస్తున్నామని, ఆయన వెనుక తాము ఉన్నామని పవన్ స్పష్టం చేశారు. ప్రధానిగా మోడీ ఉన్నంత కాలం భారత్ ఏ దేశానికి భయపడాల్సిన అవసరం లేదన్నారు. మోడీ నాయకత్వంలో పనిచేయడం గర్వంగా భావిస్తున్నామని పవన్ చెప్పారు.
