ఏపీ సీఎం జగన్ ప్రతి సభలో చెప్పే ఒక డైలాగ్ బాగా పాపులర్. తాను పేదవాడినని, పేదల పక్షపాతినని…అందుకే రాబోయే ఎన్నికలు పేదవారికి, పెత్తందార్లకు మధ్య జరగబోతున్నాయని జగన్ పదే పదే చెబుతుంటారు. ఆ క్రమంలోనే జగన్ వ్యాఖ్యలకు టీడీపీ అధినేత చంద్రబాబు కూడా కౌంటర్ ఇచ్చారు. కనీసం కట్ డ్రాయర్ కూడా లేని పేదవాడు జగన్ అని చంద్రబాబు ఎద్దేవా చేశారు. ఈ క్రమంలోనే తాజాగా జగన్ పేదరికంపై సోషల్ మీడియాలో తాజాగా మరో ట్రోలింగ్ మొదలైంది.
సంక్రాంతి పండుగ సందర్భంగా పేదవాడు కదా జస్ట్ కోటిన్నర పెట్టి తన ఇంటి దగ్గర ఒక గుడి, గ్రామం సెట్ వేయించారని ట్రోల్స్ వస్తున్నాయి. హైదరాబాద్ కు చెందిన ప్రముఖ వెడ్డింగ్ ప్లానర్స్ ఈ సెట్ వేశారని అందుకు సంబంధించిన సెట్ వీడియో సోషల్ మీడియాలో వైరల్ గా మారింది. సంక్రాంతికి ఎవరైనా సొంతూరుక వెళుతుంటారని, కానీ, జగన్ మాత్రం ఇంటి దగ్గరకే గ్రామాన్ని తెచ్చుకున్నారని ఎద్దేవా చేస్తున్నారు. పులివెందులలో పండగ చేసుకోవాల్సిన జగన్…ఇలా సెట్ లు వేయించడంపై ట్రోలింగ్ జరుగుతోంది. ప్రతి సంవత్సరం నారావారి పల్లెకు వెళ్లి చంద్రబాబు కుటుంబ సమేతంగా సంక్రాంతి సంబరాలు చేసుకుంటున్న సంగతిని గుర్తు చేస్తూ జగన్ ను విమర్శిస్తున్నారు.
