పవర్ స్టార్ పవన్ కళ్యాణ్ పుట్టిన రోజు నేడు. ఈ బర్త్ డే అభిమానులకు ఎంత ప్రత్యేకమో చెప్పాల్సిన పని లేదు. పవన్ తొలిసారి ఎమ్మెల్యేగా బంపర్ మెజారిటీతో గెలవడమే కాక, నాలుగు శాఖల మంత్రిగా, డిప్యూటీ చీఫ్ మినిస్టర్‌గా బాధ్యతలు నిర్వర్తిస్తున్న తరుణంలో వచ్చిన తొలి పుట్టిన రోజు కావడంతో సామాజిక మాధ్యమాల్లో సంబరాలు మామూలుగా లేవు.
ఈ సందర్భంలో పవన్ చేతిలో ఉన్న సినిమాలకు సంబంధించి కొత్త అప్ డేట్స్ కోసం అభిమానులు ఆశగా ఎదురు చూస్తున్నారు. ‘ఓజీ’ మూవీ నుంచి ఫస్ట్ సింగిల్ రిలీజ్ చేస్తారని.. ‘హరిహర వీరమల్లు’ నుంచి కొత్త పోస్టర్ వస్తుందని.. అలాగే ‘ఉస్తాద్ భగత్ సింగ్’ నుంచి కూడా ఏదో ఒక అప్‌డేట్ ఉంటుందని ఆశించారు ఫ్యాన్స్. కానీ ప్రస్తుత వాతావరణ పరిస్థితులు ఇందుకు అడ్డంకిగా మారాయి.
ఏపీలో విజయవాడ సహా పలు ప్రాంతాలను వరద ముంచెత్తి జనం అల్లాడుతున్న సంగతి తెలిసిందే.
ఈ నేపథ్యంలో సామాజిక మాధ్యమాల్లో పవన్ కొత్త సినిమాల అప్‌డేట్స్ ఇచ్చి సెలబ్రేట్ చేయడం కరెక్ట్ కాదని ఆయా చిత్రాల నిర్మాతలు నిర్ణయించుకున్నారు. ‘హరిహర వీరమల్లు’కు సంబంధించి కొత్త పోస్టర్ రిలీజ్ చేయాలనుకుని, ప్రస్తుత పరిస్థితుల దృష్ట్యా.. పవన్ అభీష్టానికి వ్యతిరేకంగా ఆ పని చేయాలనుకోవట్లేదని నిర్మాత ఏఎం రత్నం స్వయంగా ప్రకటించారు. ఓజీ, ఉస్తాద్ భగత్ సింగ్ టీంలకు కూడా పవన్ నుంచి ఈ మేరకు సూచన వెళ్లినట్లు తెలుస్తోంది. దీంతో ఏ సినిమా నుంచి కూడా కొత్త అప్‌డేట్ కనిపించలేదు ఈ రోజు.
ఐతే పవన్ ఫ్యాన్స్ మాత్రం అదిరిపోయే ఎడిట్స్‌తో, అలాగే ‘గబ్బర్ సింగ్’ రీ రిలీజ్ మేనియాతో పవన్ పుట్టిన రోజును ఆన్ లైన్, ఆఫ్ లైన్లో బాగానే సెలబ్రేట్ చేస్తున్నారు. మునుపెన్నడూ లేని స్థాయిలో రాజకీయ, సినీ ప్రముఖులు పవన్‌కు ఎలివేషన్ ఇస్తూ పుట్టిన రోజు శుభాకాంక్షలను పోస్ట్ చేస్తున్నారు.
