నందమూరి నటసింహం, మాస్ కా బాప్ నందమూరి బాలకృష్ణ ‘అఖండ’ చిత్రం తర్వాత వరుస సినిమాలను పట్టాలెక్కించిన సంగతి తెలిసిందే. ‘అఖండ’తో ఇండస్ట్రీకి ఊపిరి పోసిన బాలయ్య…యువ స్టార్ హీరోల దీటుగా యంగ్ డైరెక్టర్లకు అవకాశాలిచ్చారు. గోపీచంద్ మలినేని, కొరటాల శివ, సంపత్ నంది, అనిల్ రావిపూడి, శ్రీకాంత్ అడ్డాల వంటి యువ దర్శకులతో చిత్రాలకు బాలయ్య గ్రీన్ సిగ్నల్ ఇచ్చేశారు. ఈ క్రమంలోనే మాస్ డైరెక్టర్ గా మంచి పేరున్న గోపీచంద్ మలినేని, మాస్ కా బాప్ బాలయ్యల కాంబోలో రాబోతోన్న #NBK107 చిత్రంపై విపరీతమైన క్రేజ్ ఏర్పడింది.
ఆ క్రేజ్ కు తగ్గట్టుగానే ఈ చిత్రం నుంచి గతంలో విడుదలైన బాలయ్య లుక్ వైరల్ అయింది. ఈ క్రమంలోనే తాజాగా నేడు ఎన్టీఆర్ శత జయంతి సందర్భాన్ని పురస్కరించుకుని ఈ చిత్రం ఫస్ట్ లుక్ పోస్టర్ ను చిత్ర యూనిట్ విడుదల చేసింది. జనమంతా చూస్తుండగా చేతిలో రక్తమోడుతున్న కత్తితో శత్రు సంహారం చేస్తున్న వీరుడిలా బాలయ్య బాబు పవర్ ఫుల్ లుక్ లో కనిపిస్తున్నారు. ఈ ఫస్ట్ లుక్ పోస్టర్ సోషల్ మీడియాలో వైరల్ అయింది.
ఈ ఫస్ట్ లుక్ పోస్టర్ నందమూరి ఫ్యాన్స్‌కు కిక్ ఇచ్చింది. సాల్ట్ అండ్ పెప్పర్ మాస్ లుక్‌లో బాలయ్య గెట‌ప్ అదిరిందని నందమూరి అభిమానులు పండగ చేసుకుంటున్నారు. ఆ పవర్ ఫుల్ లుక్ కు తగ్గట్టుగా సినిమాకు ఎలాంటి ప‌వ‌ర్‌ఫుల్ టైటిల్ పెడ‌తారోనని ఆసక్తిగా ఎదురుచూస్తున్నారు. ఈ చిత్రానికి జై బాలయ్య, అన్నగారు అనే టైటిల్స్ పరిశీలనలో ఉన్నాయని టాక్. వాస్తవానికి ఈ రోజు NBK 107 టైటిల్ ప్రకటిస్తారని అందరూ భావించినా…ఫస్ట్ లుక్ తో చిత్ర యూనిట్ సరిపెట్టింది.
ఇక, NBK 107లో బాలకృష్ణ ద్విపాత్రాభిన‌యంలో కనిపించబోతున్నారు. బాలయ్య సరసన శ్రుతీ హాస‌న్ హీరోయిన్‌గా న‌టిస్తోంది. ఈ చిత్రంలో వ‌ర‌ల‌క్ష్మి శ‌ర‌త్ కుమార్ ఓ కీలక పాత్ర‌లో కనిపించబోతున్నారు. క్రాక్ వంటి సెన్సేష‌న‌ల్ హిట్ తర్వాత గోపీచంద్ మలినేని తెర‌కెక్కిస్తోన్న ఈ చిత్రంపై భారీ అంచనాలున్నాయి. వాస్తవ ఘ‌ట‌న‌ల ఆధారంగా బాలయ్య బాబు ఇమేజ్‌కు తగ్గట్టుగా క‌థ‌ను డిజైన్ చేసిన‌ట్టు గోపీచంద్ తెలిపారు. కన్నడలో శివరాజ్ కుమార్ నటించిన ఓ బ్లాక్ బస్టర్ హిట్ మూవీకి రీమేక్ ఇదని అనుకుంటున్నారు.
