‘ఆర్ఆర్ఆర్’…ప్రస్తుతం ఇరు తెలుగు రాష్ట్రాల్లో మార్మోగిపోతోన్న ‘తారక్’ మంత్రం. నాలుగేళ్ల నిరీక్షణకు తెరదించుతూ దర్శక ధీరుడు రాజమౌళి యావత్ భారత దేశానికి అందించిన విజువల్ వండర్. ఈ రోజు విడుదలైన ఈ భారీ మల్టీ స్టారర్ పాన్ ఇండియా మూవీ సూపర్ హిట్ టాక్ తో దూసుకుపోతోంది. ఏపీ, తెలంగాణతో పాటు అమెరికా వంటి ఓవర్సీస్ మార్కెట్ లోనూ రికార్డు స్థాయిలో కలెక్షన్లు కొల్లగొడుతూ మరో బాహుబలి అనిపించేలా బాక్సాఫీస్ ను షేక్ చేస్తోంది.
రామ్ చరణ్, తారక్ లు ఈ సినిమాలో ఓ రేంజ్ లో నటించారని, ఇద్దరికీ జాతీయ అవార్డులు ఖాయమని సినీ విశ్లేషకులు అంటున్నారు. ఇప్పటికే ఈ చిత్రంపై పలువురు సినీ ప్రముఖులు, సినీ విమర్శకులు, అభిమానులు ప్రశంసలు కురిపిస్తున్నారు. ఈ చిత్రంలో జూ.ఎన్టీఆర్, రామ్ చరణ్ పోటాపోటీగా నటించారని, తెలుగు సినిమా చరిత్రలోనే కాకుండా యావత్ భారతీయ సినీ చరిత్రలో ఆర్ఆర్ఆర్ చిరస్థాయిగా నిలిచిపోతుందని అంటున్నారు. ఈ క్రమంలోనే తాజాగా చిత్రంపై టీడీపీ జాతీయ ప్రధాన కార్యదర్శి నారా లోకేశ్ స్పందించారు.
ఈ రోజు విడుదలైన ఆర్ఆర్ఆర్ సినిమాకు తిరుగులేని రివ్యూలు వస్తున్నట్టు తెలిసిందని లోకేశ్ అన్నారు. ఈ చిత్రం ద్వారా ప్రేక్షకులకు గొప్ప అనుభూతిని అందిస్తున్న తారక్, రామ్ చరణ్, మ్యాస్ట్రో రాజమౌళిని, యావత్ చిత్రబృందాన్ని అభినందిస్తున్నానని చెప్పారు. అంతేకాదు, ఈ వారంలో ఆర్ఆర్ఆర్ సినిమాను కుటుంబసమేతంగా తప్పకుండా చూస్తానని చెప్పారు. ఈ సినిమా రికార్డులను బద్దలు కొట్టాలని కోరుకుంటున్నంటూ చిత్ర యూనిట్ కు ఆల్ ది బెస్ట్ చెప్పారు లోకేశ్. ఈ సినిమా బాగుందంటూ ‘ఆర్ఆర్ఆర్’పై లోకేశ్ ఇచ్చిన రివ్యూ సోషల్ మీడియాలో వైరల్ అయింది.
