నట సింహం నందమూరి బాలకృష్ణ తనయుడు నందమూరి మోక్షజ్ఞ తేజ ఎట్టకేలకు హీరోగా సినిమా పరిశ్రమలోకి అడుగు పెట్టేందుకు సిద్ధం అవుతున్నాడు. మోక్షజ్ఞ ఎంట్రీ కోసం గత కొన్నేళ్ల నుంచి కళ్ళల్లో వత్తులు వేసుకుని మరీ చూస్తున్న నందమూరి అభిమానుల ఎదురు చూపులకు తెరపడే సమయం దగ్గర పడింది. మోక్షజ్ఞ ఫిల్మ్ ఎంట్రీకి బాలయ్య సర్వం సిద్ధం చేస్తున్నారు.
ఇప్పటికే పలువురు దర్శకులు చేత మోక్షజ్ఞ డెబ్యూ మూవీ కోసం కథలు సిద్ధం చేయించారు. అనేక కథలు విన్నారు. ఫైనల్ గా హనుమాన్ మూవీతో పాన్‌ ఇండియా స్థాయిలో బిగ్గెస్ట్ బ్లాక్ బస్టర్ అందుకున్న టాలెంటెడ్ డైరెక్టర్ ప్రశాంత్‌ వర్మకు బాలయ్య తన వారసుడి డెబ్యూ బాధ్యతను అప్పగించారట. దాంతో ప్రశాంత్‌ వర్మ మోక్షజ్ఞకు సరిపడే విధంగా ఓ అద్భుత‌మైన కథను సిద్ధం చేశాడట. ఆ కథ బాలయ్యకు నచ్చడంతో సినిమా ప్రారంభించడానికి పనులు స్టార్ట్ చేయండి చెప్పినట్టు ఇండస్ట్రీ వర్గాల్లో బలంగా ప్రచారం జరుగుతుంది.
కుమారుడి తొలి చిత్రానికి బాల‌య్య‌నే నిర్మాత‌గా వ్య‌వ‌హ‌రించ‌బోతున్నారు. సెప్టెంబర్ 6న మోక్షజ్ఞ బర్త్‌డే. ఆ రోజు సినిమా అనౌన్స్మెంట్ ఉంటుందని కూడా వార్తలు వస్తున్నాయి. ఇక డెబ్యూ మూవీ కోసం మోక్షజ్ఞ కసరత్తులు చేస్తున్నాడు. గతంలో కాస్త లావుగా ఉన్న ఆయ‌న.. ఇటీవల స్లిమ్‌గా మరియు హ్యాండ్స‌మ్‌ మారాడు. తాజాగా స్టైలిష్ మేకోవ‌ర్ లో కనిపించి సోషల్ మీడియాలో తెగ ట్రెండ్ అవుతున్నాడు. మోక్షజ్ఞ కొత్త ఫొటోలు చూసి అభిమానులు కూడా ఆశ్చ‌ర్య‌పోతున్నారు.
