తెలుగు బుల్లితెరపై మెగా హిట్ అయిన రియాలిటీ షోస్ లో `బిగ్ బాస్` ముందు వరుసలో ఉంటుంది. ఇప్పటికే 7 సీజన్లు కంప్లీట్ అయ్యాయి. ప్రస్తుతం సీజన్ 8 కు బిగ్ బాస్ హౌస్ ను ముస్తాబు చేస్తున్నారు. సెప్టెంబర్ నుంచి బిగ్ బాస్ సీజన్ 8 ప్రారంభం కాబోతోంది. ఈసారి కూడా నాగార్జునే హోస్ట్ గా వ్యవహరించబోతున్నారు. ఇందుకు సంబంధించి ఒక‌ట్రెండు టీజర్లు కూడా నిర్వాహకులు బయటకు వదిలారు.
మరోవైపు నెక్స్ట్ సీజన్ లో పాల్గొన‌బోయే కంటెస్టెంట్స్ వీళ్లే అంటూ పలువురు సెలబ్రిటీల పేర్లు సోషల్ మీడియాలో తెగ చక్కర్లు కొడుతున్నాయి. అయితే ఈ జాబితాలో తాజాగా ఎవరు ఊహించని విధంగా ఓ నందమూరి హీరో పేరు వచ్చి చేరడం హాట్ టాపిక్ గా మారింది. ఇంతకీ ఆ హీరో మరెవరో కాదు నందమూరి చైతన్య కృష్ణ. దివంగత నటుడు నందమూరి తారక రామారావు గారి కొడుకుల్లో జయకృష్ణ ఒకరు. ఆయన కొడుకే చైతన్య కృష్ణ.
2003లో జగపతి బాబు హీరోగా వచ్చిన `ధమ్`లో ఓ గుర్తుంపు లేని పాత్ర‌ను పోషించి వెండితెర‌పై అడుగుపెట్టిన చైతన్య కృష్ణ.. ఆ త‌ర్వాత సినిమాల‌కు దూరంగా ఉన్నారు. చాలా ఏళ్ల అనంత‌రం మ‌ళ్లీ ఇటీవ‌ల బ్రీత్ అనే మూవీతో హీరోగా చైతన్య కృష్ణ రీఎంట్రీ ఇవ్వ‌డం జ‌రిగింది. మెడికల్ మాఫియా నేపథ్యంలో వచ్చిన ఈ థ్రిల్లర్ మూవీ గ‌త ఏడాది డిసెంబర్ లో విడుద‌లై ప‌రాజ‌యం పాలైంది.
అయితే చైతన్య కృష్ణ న‌ట‌న‌కు మాత్రం మంచి మార్కులు ప‌డ్డాయి. ఇక‌పోతే ఇప్పుడు ఈ నందమూరి హీరో బిగ్ బాస్ హౌస్ లోకి అడుగు పెట్ట‌బోతున్నాడ‌ని జోరుగా ప్ర‌చారం జ‌రుగుతోంది. దీనిపై ఎటువంటి అధికారిక ప్ర‌క‌ట‌న లేదు. కానీ నిజంగా బిగ్ బాస్ సీజన్ 8కి చైతన్య కృష్ణ ఎంట్రీ ఇస్తే.. నందమూరి ఫ్యాన్స్ కి పూన‌కాలు ఖాయం అన‌డంలో ఎటువంటి సందేహం లేదు.
