వివేకా హత్య కేసులో వైసీపీ ఎంపీ అవినాష్ రెడ్డి మరోసారి తెలంగాణ హైకోర్టు తలుపుతట్టారు. వివేక హత్య కేసు విచారణకు సంబంధించిన వివరాలు ఇచ్చేలా సిబిఐని ఆదేశించాలంటూ హైకోర్టులో మధ్యంతర పిటిషన్ ను అవినాష్ రెడ్డి దాఖలు చేశారు. ఇప్పటికే అవినాష్ రెడ్డి మూడుసార్లు సిబిఐ విచారణకు హాజరయ్యారు. ఈ సందర్భంగానే ఆ విచారణకు సంబంధించిన ఆడియో, వీడియో రికార్డులు సమర్పించేలా సిబిఐని ఆదేశించాలని అవినాష్ రెడ్డి కోరారు. మరి, అవినాష్ రెడ్డి పిటిషన్ పై హైకోర్టు స్పందన ఏ విధంగా ఉంటుంది అన్నది ఆసక్తికరంగా మారింది.
మరోవైపు, వివేకా కేసు విచారణ సందర్భంగా నాటకీయ పరిణామాలు జరుగుతున్నాయి. ఈ కేసు విచారణ ఓ కొలిక్కి వచ్చిందని అనుకుంటున్న తరుణంలో ఈ కేసు విచారణ అధికారి రాంసింగ్ సరిగా విచారణ చేయడం లేదంటూ సుప్రీం కోర్టులో పిటిషన్ దాఖలైంది. దీంతో, రాంసింగ్ కు తోడుగా మరో అదనపు అధికారిని నియమించాలని సీబీఐని సుప్రీం కోర్టు ఆదేశించింది. అంతేకాదు, అవినాష్ రెడ్డి అరెస్టు దాదాపుగా ఖాయమని ప్రచారం జరుగుతున్న నేపథ్యంలో ఈ కేసు మరో కీలక మలుపు తిరిగింది.
ఈ కేసులో ముందస్తు బెయిల్ కోరుతూ తెలంగాణ హైకోర్టును ఎంపీ అవినాష్ రెడ్డి ఆశ్రయించడం తీవ్ర చర్చనీయాంశమైంది. ఈ కేసులో ఇప్పటికే అవినాష్ రెడ్డిని సిబిఐ అధికారులు మూడు సార్లు విచారణకు పిలిచారు. త్వరలోనే మరోసారి అవినాష్ రెడ్డిని విచారణకు పిలుస్తారని, ఈసారి విచారణ తర్వాత ఆయనను అరెస్టు చేసే అవకాశాలు ఉన్నాయని ముమ్మరంగా ప్రచారం జరుగుతోంది. ఈ క్రమంలోనే ముందస్తు బెయిల్ కోసం అవినాష్ రెడ్డి హైకోర్టులో పిటిషన్ దాఖలు చేయడం ప్రాధాన్యతను సంతరించుకుంది.
