మంచు విష్ణు ‘కన్నప్ప’ సినిమాను ప్రకటించినపుడు ఏంటో అనుకున్నారు కానీ.. అతను ఈ సినిమాను చాలా భారీ స్థాయిలోనే ప్లాన్ చేసినట్లు కనిపిస్తోంది. ఈ సినిమా కాస్టింగ్‌కు సంబంధించి బయటికి వస్తున్న ఒక్కో అప్‌డేట్ ఆశ్చర్యానికి గురి చేస్తోంది. ఇప్పటికే ప్రభాస్ ఇందులో శివుడి పాత్ర చేయబోతున్న విషయాన్ని అధికారికంగానే ప్రకటించాడు విష్ణు. ప్రభాస్ కాసేపు కనిపించినా చాలు.. ఈ సినిమాకు వచ్చే క్రేజే వేరుగా ఉంటుంది.
ప్రభాస్ చాలదన్నట్లు నయనతార కూడా ఇందులో పార్వతి పాత్ర చేయనున్న విషయం సీనియర్ నటి మధుబాల ఓ ఇంటర్వ్యూలో వెల్లడించింది. తాను కూడా ఈ చిత్రంలో నటిస్తున్న విషయాన్ని వెల్లడించింది. ఇటీవలే ఈ సినిమా చిత్రీకరణను ఫారిన్లో మొదలుపెడుతున్న విషయాన్ని వెల్లడించిన విష్ణు.. ప్రేక్షకులను మరింత ఎగ్జైట్ చేసే కాస్టింగ్ ఈ చిత్రంలో ఉందని.. రాబోయే రోజుల్లో ఆ వివరాలు వెల్లిస్తామని ప్రకటించాడు.
ఇప్పుడు నిజంగానే కాస్టింగ్‌కు సంబంధించి అతను ఒక ఎగ్జైటింగ్ అప్‌డేట్ ఇచ్చాడు. మలయాళ సూపర్ స్టార్ మోహన్ లాల్ ‘కన్నప్ప’లో భాగమవుతున్న విషయాన్ని ఈ రోజు అతను వెల్లడించాడు. మోహన్ లాల్‌ను కలిసి ఉన్న ఫొటోను కూడా అతను సోషల్ మీడియాలో షేర్ చేశాడు. మోహన్ లాల్ వేరే భాషల్లో ఆషామాషీగా సినిమాలు ఒప్పుకోడు. తెలుగులో ఆయన ముఖ్య పాత్ర పోషించిన ‘జనతా గ్యారేజ్’ పెద్ద హిట్టయిన సంగతి తెలిసిందే.
విశేషం ఏంటంటే.. లాల్ నటించిన ఓ మలయాళ చిత్రంలో మంచు లక్ష్మీప్రసన్న విలన్ పాత్ర చేసింది. ఇప్పుడు అందుకు బదులుగానేమో.. లాల్ ‘కన్నప్ప’లో భాగం అవుతున్నట్లున్నాడు. ఇలా రాబోయే రోజుల్లో మరికొన్ని ఎగ్జైటింగ్ అప్‌డేట్స్ ఇవ్వబోతున్నాడట విష్ణు. మొత్తానికి కాస్టింగ్ వరకు చూస్తే సినిమా వేరే లెవెల్లో ఉండబోతోందని అర్థమవుతోంది. ‘మహాభారతం’ సీరియల్ ఫేమ్ ముకేశ్ కుమార్ సింగ్ దర్శకత్వం వహిస్తున్న ఈ చిత్రాన్ని మోహన్ బాబు నిర్మిస్తున్నారు.
