కన్నడ రాకింగ్ స్టార్ యష్, ఏస్ డైరెక్టర్ ప్రశాంత్ నీల్ కాంబోలో తెరకెక్కిన ‘కేజీఎఫ్’ సినిమా…అఖండ విజయం సాధించిన సంగతి తెలిసిందే. ఏ మాత్రం అంచనాలు లేకుండా విడుదలైన ఈ చిత్రం…దక్షిణాదితోపాటు దేశవ్యాప్తంగా బ్లాక్ బస్టర్ హిట్ గా నిలిచింది. పాన్ ఇండియా మూవీగా పలు రికార్డులు క్రియేట్ చేసింది. దీంతో, ‘కేజీఎఫ్ : చాప్టర్ 2’ కోసం యావత్ భారతదేశపు సినీ అభిమానులు ఎంతో ఆసక్తిగా ఎదురుచూస్తున్నారు.
ఇప్పటికే విడుదలైన ఈ పాన్ ఇండియా మూవీ టీజర్ యూట్యూబ్ లో రికార్డు వ్యూస్ సొంతం చేసుకుంది. ఈ నేపథ్యంలో తాజాగా కేజీఎఫ్ చాప్టర్ -2 నుంచి మరో ఇంటరెస్టింగ్ అప్డేట్ లీక్ అయింది. ఈ చిత్రంలో ఓ బాలీవుడ్ ఆల్ టైం హిట్ సాంగ్ ను రీమేక్ చేయబోతున్నారని టాక్ వస్తోంది. బాలీవుడ్ బిగ్ బీ అమితాబ్ బచ్చన్, వెటరన్ హీరో ధర్మేంద్ర కలిసి నటించిన ‘షోలే’ చిత్రంలోని మెహబూబా.. మెహబూబా పాటను ఈ సినిమా కోసం రీమిక్స్ చేశారట.
అంతేకాదు, హైదరాబాద్ లోనే ఈ పాట షూటింగ్ పూర్తి చేశారట. షోలేలోని ఆ పాట అప్పట్లో అభిమానులందరినీ ఉర్రూతలూగించింది. ఈ తరంలో పార్టీల్లో కూడా కొంతమంది ఈ క్లాసిక్ వింటేజ్ సాంగ్ ను వింటూనే ఉంటారు. అందుకే, ఈ పాటను యష్ చేత రీమిక్స్ చేయించాడట ప్రశాంత్ నీల్. అయితే ఈ పాట కోసం యష్ తో కలిసి చిందేసిన ఆ బ్యూటీ ఎవరన్నది మాత్రం సస్పెన్స్ అట. అయితే, ఈ పాట కేవలం హిందీ వరకే పరిమితమా…లేక అన్ని భాషల్లోనూ ఉంటుందా అన్నది తేలాల్సి ఉంది. ఇక, కేజీఎఫ్ లో రాఖీ భాయ్ సరసన దోచేయ్ అంటూ ఓ ఐటమ్ సాంగ్ లో మిల్కీ బ్యూటీ తమన్నా స్టెప్పులేసిన సంగతి తెలిసిందే.
