`మ్యాడ్` పోరగాళ్ల లొల్లి మ‌రింత ముందుగా..!

యంగ్ టైగ‌ర్ ఎన్టీఆర్ బావ‌మ‌రిది నార్నే నితిన్ డెబ్యూ మూవీ `మ్యాడ్` ఎలాంటి విజ‌యాన్ని సాధించిందో తెలిసిందే. కళ్యాణ్ శంకర్ తొలిసారిగా దర్శకత్వం ఈ అవుట్ అండ్ అవుట్ కామెడీ డ్రామాలో నితిన్ నార్నేతో పాటుగా సంగీత్ శోభన్, రామ్ నితిన్ ప్రధాన పాత్రలు పోషించారు. 2023 అక్టోబ‌ర్ 6న ఎటువంటి అంచ‌నాలు లేకుండా వ‌చ్చిన మ్యాడ్ సూప‌ర్ డూప‌ర్ హిట్ గా నిలిచింది. బాక్సాఫీస్ వ‌ద్ద కాసుల వ‌ర్షాన్ని కురిపించింది.

బీటెక్ కాలేజీలో ముగ్గురు కుర్రాళ్లు, వాళ్లు చేసే అల్లరి, వారి ల‌వ్ స్టోరీస్ నేప‌థ్యంలో రూపుదిద్దుకున్న మ్యాడ్ విమ‌ర్శ‌కుల నుంచి సైతం ప్ర‌శంస‌లు అందుకుంది. అయితే ఈ హిట్ మూవీకి సీక్వెల్ గా `మ్యాడ్ స్క్వేర్` రాబోతున్న సంగ‌తి తెలిసిందే. షూటింగ్ ఇప్ప‌టికే కంప్లీట్ అయింది. సీక్వెల్‌ను మరింత వినోదాత్మకంగా కళ్యాణ్ శంకర్ తెర‌కెక్కించారు.
`
మ్యాడ్ 2లో కూడా సంగీత్ శోభన్, నార్నే నితిన్, రామ్ నితిన్ సంద‌డి చేయ‌బోతున్నారు. ఇటీవ‌ల బ‌య‌ట‌కు వ‌చ్చిన పోస్ట‌ర్స్‌, `లడ్డు గాని పెళ్లి` సాంగ్ కు విశేష‌మైన రెస్పాన్స్ వ‌చ్చింది. ఇక‌పోతే శ్రీకర స్టూడియోస్‌, సితార ఎంటర్‌టైన్‌మెంట్స్, ఫార్చ్యూన్ ఫోర్ సినిమాస్ బ్యాన‌ర్ల‌పై నిర్మిత‌మైన మ్యాడ్ స్క్వేర్ ను క్రిస్మస్ సీజన్ లో రిలీజ్ చేయాల‌ని మొద‌ట భావించారు. కానీ థియేట‌ర్స్ లో మ్యాడ్ పోరగాళ్ల లొల్లి మ‌రింత ముందుగా ప్రారంభం కాబోతోంది. డిసెంబ‌ర్ లో కాకుండా న‌వంబ‌ర్ లోనే సీక్వెల్ ను రిలీజ్ చేయాల‌ని నిర్మాత‌లు ప్లాన్ చేస్తున్నార‌ట‌. అతి త్వ‌ర‌లోనే దీనిపై అధికారిక ప్ర‌క‌ట‌న రానుంద‌ని ఇండ‌స్ట్రీ వ‌ర్గాల్లో జోరుగా ప్ర‌చారం జ‌రుగుతోంది.