నందమూరి నటసింహం బాలకృష్ణ, గోపీ చంద్ మలినేనిల కాంబినేషన్ లో తెరకెక్కిన ‘వీరసింహా రెడ్డి’ సినిమాపై భారీ అంచనాలున్నాయి. ఇప్పటివరకు ఆ చిత్రం నుంచి విడుదలైన ప్రతి అప్డేట్ ఆ అంచనాలను మరింత పెంచేలా ఉంది. ఈ కోవలోనే తాజాగా ఆ సినిమా నుంచి ‘మా బావ మనోభావాల్ దెబ్బతిన్నాయి’ లిరికల్ సాంగ్ ఫుల్ వెర్షన్ ను చిత్ర యూనిట్ విడుదల చేసింది. హైదరాబాద్ లోని ఆర్టీసీ ఎక్స్ రోడ్ లో ఉన్న ‘సంధ్య 35 MM’ థియేటర్లో నిర్వహించిన ఓ మినీ ఈవెంట్ ద్వారా బాలయ్య ఊర మాస్ స్టెప్పులేసిన ఈ పాటను రిలీజ్ చేశారు.
‘చుడీదారు ఇష్టమంట ఆడికీ.. వద్దొద్దన్న ఎండలకాలం ఏడీకి’ అంటూ మొదలయ్యే ఈ ఊర మాస్ సాంగ్ యూట్యూబ్ లో దుమ్మురేపుతోంది. శేఖర్ మాస్టర్ కొరియోగ్రఫీ అందించిన ఈ పాటలో హనీ రోజ్ హాట్ గా అందాలు ఆరబోసింది. ఇక, మలయాళ నటి చంద్రికా రవితోపాటు హనీ రోజ్ తో కలిసి బాలయ్య బాబు మాస్ స్టెప్పులతో రచ్చ చేశాడు. రామజోగయ్య శాస్త్రి సాహిత్యాన్ని అందించిన ఈ పాటను సాహితి చాగంటి, యామిని, రేణు కుమార్ ఆలపించారు. ఈ పాట ఫుల్ వెర్షన్ థియేటర్లో చూస్తే బాలయ్య ఫ్యాన్స్ కు పూనకాలు ఖాయం.
“జనవరి 12 నుంచి మామూలుగా ఉండదు. అన్ని థియేటర్స్ లో ‘జై బాలయ్య’ నినాదం మోగుతూనే ఉంటుంది. ఇప్పుడు మీరు చూసిన సాంగ్ జస్ట్ శాంపిల్ మాత్రమే. ఈ సాంగ్ లో సిగరెట్ స్టెప్ ఒకటి .. సోడా స్టెప్ ఒకటి ఉంటాయి. ఆ స్టెప్స్ మామూలుగా ఉండవు. ఇప్పుడు అన్నపూర్ణ స్టూడియోలో ఒక పాట షూటింగు జరుగుతోంది. ఆ పాట గురించి చెప్పాలంటే ఫ్యాన్స్ కి ఇక పండగే. నాకు తెలిసి థియేటర్స్ లో ఎవరూ సీట్లలో కూర్చోరు. అంత బీభత్సంగా ఉంటుంది. జనవరి 12న వస్తున్నాం .. రెడీగా ఉండండి” అంటూ బాలయ్య ఫ్యాన్స్ కు సంక్రాంతి వరకు ఉండేలా మాంచి కిక్ ఇచ్చారు గోపీచంద్ మలినేని.
