ప్రమోషన్..పబ్లిసిటీ…ఈ రోజుల్లో ఒక సినిమా హిట్ కావడంలో ఈ రెండూ కీలక పాత్ర పోషిస్తున్న సంగతి తెలిసిందే. అందుకే లో బడ్జెట్ లో తీసిన చిన్నా చితకా సినిమాలు మొదలు…భారీ బడ్జెట్ సినిమాల వరకు ప్రమోషన్లు భారీగా చేస్తున్నాయి. విడుదలకు ముందు చిత్రాన్ని జనం దృష్టిలో పడేలా చేసేందుకు ఈ ప్రమోషన్లే ఎంతో కీలకం. అయితే, మెగా స్టార్ చిరంజీవి వంటి పెద్ద హీరో చిత్రం గాడ్ ఫాదర్ ప్రమోషన్ల విషయంలో మాత్రం చిత్ర యూనిట్ ఎందుకో చాలా వెనుకబడి ఉంది.
అక్టోబర్ 5న దసరా కానుకగా ఈ చిత్రం విడుదలకు సిద్ధమైనప్పటికీ…చెప్పుకోదగ్గ స్థాయిలో ప్రమోషన్లు జరగలేదన్న విమర్శలు వచ్చాయి. ఈ క్రమంలోనే తాజాగా ఆ చిత్రం నుంచి తొలి లిరికల్ వీడియో సాంగ్ రిలీజైంది. మోహన్ రాజా డైరెక్షన్ లో తెరకెక్కుతున్న ఈ సినిమా నుంచి లేటుగా విడుదలైన ఈ సాంగ్ యూట్యూబ్ లో దుమ్మురేపుతోంది. ఈ చిత్రంలో ప్రత్యేక పాత్రలో నటించిన బాలీవుడ్ కండల వీరుడు సల్మాన్ ఖాన్ తో కలిసి మెగా స్టార్ చిరు వేసిన స్టెప్పులు యూట్యూబ్ ను షేక్ చేస్తున్నాయి.
యంగ్ మ్యూజిక్ సెన్సేషన్ తమన్ కంపోజ్ చేసిన ఎనర్జిటిక్ నంబర్ కు చిరు, సల్లూ భాయ్ లు అదిరిపోయే స్టెప్పులేశారు. లేటుగా …లేటెస్టుగా వచ్చిన ఈ పాటలోని స్టెప్పులు మెగా ఫ్యాన్స్ కు పూనకం తెప్పిస్తున్నాయి. ప్రముఖ కొరియోగ్రాఫర్ ప్రభుదేవా కొరియోగ్రఫీ చేసిన ఈ పాటలో ఆయన కూడా తళుక్కున మెరిశాడు. ఏది ఏమైనా…ప్రస్తుతం ఈ లిరికల్ సాంగ్ సోషల్ మీడియాలో ట్రెండ్ అవుతోంది. మరి, విడుదల తేదీకి పెద్ద సమయం లేనందున..మరిన్ని అప్డేట్లతో ప్రమోషన్ల జోరు పెంచుతారేమో వేచి చూడాలి.
