ఓవైపు అసెంబ్లీ వాడీ వేడిగా సాగుతున్న వేళ.. మీడియా ఫోకస్ మొత్తం అటు వైపు ఉన్న వేళలో తనవైపు తిప్పుకునేలా చేయటంలో అంతో ఇంతో సక్సెస్ అయ్యారు లావణ్య. టాలీవుడ్ హీరో రాజ్ తరుణ్ తనను మోసం చేశాడని.. ఇప్పటికే తాము పెళ్లి చేసుకున్నట్లుగా సంచలన ఆరోపణలు చేస్తున్న లావణ్య బుధవారం మొత్తం రచ్చ రచ్చ చేసింది. గుడిలో తన మెడలో తాళి కట్టినట్లుగా ఆరోపించిన ఆమె.. తామిద్దరం కలిసి తీసుకున్న సెల్ఫీలు ఉన్నాయని.. కోర్టుకు ఇచ్చినట్లుగా చెబుతున్న ఆమె.. తనను మోసం చేసి పోలీసుకేసులో ఇరికించి పారిపోయాడంటూ ఆగ్రహాన్ని వ్యక్తం చేసింది.
తాజాగా హైదరాబాద్ లో జరిగిన రాజ్ తరుణ్..మాల్వీ నటించిన ‘తిరగబడరసామీ’ చిత్ర ప్రీరిలీజ్ ఫంక్షన్ వేళ.. ఆమె తీరు హాట్ టాపిక్ గా మారింది. కార్యక్రమం జరుగుతున్న వేదిక వద్దకు వచ్చిన ఆమె.. రాజ్ తరుణ్ ను కలుసుకోవాలంటూ పట్టుబట్టింది. అయితే.. ఆమెను ఈవెంట్ బయటే ఆపేశారు. దీంతో.. ఆమె విలేకరులతో మాట్లాడింది. అలా మొదలైన ఆమె వ్యవహారం.. బుధవారం రాత్రి వరకు సాగింది. ఫంక్షన్ వద్ద రాజ్ ను కలిసేందుకు ప్రయత్నించి ఫెయిల్ అయిన ఆమె.. రాత్రి వేళలో కొండాపూర్ లోని రాజ్ తరుణ్ ఫ్లాట్ వద్దకు వెళ్లి.. అక్కడ ధర్నాచేసే ప్రయత్నం చేశారు.
పిల్లలు వద్దనుకొని తనకు రెండుసార్లు అబార్షన్ చేయించాడని.. కనీసం విడిపోయే ముందు చెప్పలేదని.. మోసం చేసి.. పోలీసు కేసులో ఇరికించి పారిపోయాడంటూ ఆగ్రహం వ్యక్తం చేసింది. తనను ఇరికించి వెళ్లిపోయిన రాజ్ తరుణ్.. ఎప్పటికైనా తనకు సమాధానం చెప్పి తీరాల్సిందేనని పేర్కొన్నారు. మస్తాన్ సాయితో తనకున్న బంధం ఏమిటో నిరూపించుకుంటానని చెప్పిన లావణ్య.. ఆ కేసు కోర్టులో నడుస్తోందన్నారు. ఇప్పుడు మాల్వీ మల్హోత్రతో రాజ్ ఏం చేస్తున్నాడన్నది తాను నిరూపిస్తానని పేర్కొన్నారు. రాజ్ తరుణ్ తన కంట పడకుండా తప్పించుకొని తిరుగుతున్నాడని.. అతడి మేనేజర్.. అసిస్టెంట్ అందరూ తనను బ్లాక్ చేశారన్నారు.
తాను కేసు పెట్టినా రాజ్ తరుణ్ ను ఎందుకు అరెస్టు చేయలేదో తనకు తెలీదన్న లావణ్య.. బహుశా డబ్బు.. పరపతి ఉపయోగిస్తున్నాడేమో తెలీదన్నారు. తాను న్యాయం కోసం పోరాడుతున్నట్లుగా పేర్కొన్న ఆమె.. బుధవారం ఉదయం నుంచి రాత్రి వరకు అదే పనిగా పట్టువదలని విక్రమార్కుడి మాదిరి రాజ్ తరుణ్ ను కలిసే ప్రయత్నం చేశారు. అయినప్పటికీ ఆమె ప్రయత్నాలు ఫలించలేదు. మొత్తంగా వాడీవేడిగా సాగుతున్న అసెంబ్లీ సమావేశాల వేళ.. ఆ కార్యక్రమానికి ఇవ్వాల్సిన కవరేజ్ ను తన ఎపిసోడ్ తో లావణ్య కాస్తంత తీసుకున్నారని మాత్రం చెప్పక తప్పదు.
