ఈ నగరానికి ఏమైంది? రేవంత్ పై కేటీఆర్ ట్వీట్ వైరల్

తెలంగాణ సీఎం రేవంత్ రెడ్డిపై మాజీ మంత్రి కేటీఆర్ తీవ్రస్థాయిలో విమర్శలు గుప్పిస్తోన్న సంగతి తెలిసిందే. గుంపు మేస్త్రి అంటూ రేవంత్ పై కేటీఆర్ విమర్శలు చేయడం…వాటికి రేవంత్ కౌంటర్లు ఇవ్వడం పరిపాటిగా మారింది. ఈ క్రమంలోనే తాజాగా మరోసారి రేవంత్ పై కేటీఆర్ పదునైన విమర్శలు గుప్పించారు. అనుభవం లేని నాయకత్వం తెలంగాణవ్యాప్తంగా కనిపిస్తోందని రేవంత్ పాలనను కేటీఆర్ తూర్పారబట్టారు. హైదరాబాద్‌లో శాంతి లేదని, బ్రాండ్ హైదరాబాద్ మసకబారుతోదని విమర్శించారు. తెలంగాణలో శాంతి భద్రతలు క్షీణించాయని, హత్యలు పెరిగిపోతున్నాయని కేటీఆర్ చేసిన కామెంట్లు కాక రేపుతున్నాయి.
‘‘ఈ నగరానికి ఏమైంది’’ అంటూ కేటీఆర్ చేసిన ట్వీట్ వైరల్ గా మారింది.

‘ఈనాడు, ఆంధ్రజ్యోతి లాంటి ప్రముఖ పత్రికలు కూడా ఈ నగరానికి ఏమైంది?” అని ఫ్రంట్ పేజిలో వార్తలు రాసే స్థాయికి హైదరాబాద్ లో శాంతి భద్రతలు అదుపుతప్పాయని కేటీఆర్ విమర్శించారు. పాలనా అనుభవం లేని నాయకత్వం హైదరాబాద్ నుండి తెలంగాణలోని మారుమూల పల్లెటూరు వరకూ కనిపిస్తోందని కేటీఆర్ విమర్శించారు.

రేవంత్ ను విమర్శిస్తూ కేటీఆర్ చేసిన ట్వీట్ యధాతథంగా..

“బ్రాండ్ హైదరాబాద్”

ఎందుకు మసకబారుతోంది ??

విశ్వనగరంగా ఎదుగుతున్న వేళ..

ఎందుకింత కళ కోల్పోతోంది ???

సగటు హైదరాబాదీకి

కలుగుతున్న భావన ఇది..!

హైదరాబాద్ ను ప్రేమించే

ప్రతిఒక్కరిలో ఉన్న ఆవేదన ఇది..!!

పదేళ్ళు ప్రశాంతంగా ఉన్న నగరంలో

పెరిగిపోతున్న వరుస హత్యలు..

పేట్రేగిపోతున్న అంతరాష్ట్ర ముఠాలు..

రాజధాని హైదరాబాద్ లో శాంతి లేదు..

నగర ప్రజల జీవితాలకు భద్రత లేదు..

సీఎం గారు స్వయంగా…

పోలీసు కమాండ్ కంట్రోల్ సెంటర్ కు వస్తున్నా..

పోలీసింగ్ పై కమాండ్ ఏది..?

క్షీణిస్తున్న శాంతిభద్రతలపై కంట్రోల్ ఏది..??

ఓవైపు..

కుప్పకూలిన రియల్ ఎస్టేట్ రంగం..

పరిపాలనా వైఫల్యాన్ని వేలెత్తి చూపుతోంది.

మరోవైపు..

పడగవిప్పిన హత్యల సంస్కృతి..

ప్రతి కుటుంబంలో వణుకు పుట్టిస్తోంది.

ఇంకోవైపు..

తరలిపోతున్న పెట్టుబడుల పర్వం..

యువత ఉపాధి అవకాశాల్ని దెబ్బతీస్తోంది.

కాంగ్రెస్ పవర్ లోకి రాగానే

గడియ గడియకు ఏమిటీ.. పవర్ కట్ ?

సేఫ్ సిటీ గా ఉన్న మహానగరంలో..

ఎందుకు పెరుగుతోంది.. క్రైం రేట్ ??

ఇదేనా మీరు తెస్తానన్న మార్పు ?

విశ్వనగరంగా తీర్చిదిద్దడానికి..

పదేళ్లు కష్టపడి పునాదులు వేస్తే..

అధికారంలోకి రాగానే ఆగం చేస్తే ఎలా ?

ప్రపంచంతో పోటీపడే నగరంగా

ఎదుగుతున్న హైదరాబాద్ ప్రగతికి

అర్ధాంతరంగా బ్రేకులు వేస్తే ఎలా ??

దేశ రాజధాని చుట్టూ..

రాజకీయ చక్కర్లు కొట్టడంపై ఉన్న శ్రద్ధ..

చిక్కుల్లో కొట్టుమిట్టాడుతున్న

రాష్ట్ర రాజధానిపై లేకపోతే ఎలా ???

హైదరాబాద్ అంటే..

కేవలం రాజధాని కాదు..

“తెలంగాణ ఎకనమిక్ ఇంజన్ ”

ఇకనైనా..

కాంగ్రెస్ సర్కారు మేల్కొనకపోతే..

మన హైదరాబాద్ దెబ్బతింటే..

రాష్ట్రానికి కష్టమే కాదు..

యావత్ దేశానికి కూడా నష్టం..’’