మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ మంచి మాటకారి అన్న సంగతి తెలిసిందే. తన వాక్చాతుర్యంతో జనాలను కట్టి పడేయడం కేటీఆర్ స్పెషాలిటీ. అదే వాగ్ధాటితో తాజాగా ఏపీ సీఎం చంద్రబాబుపై కేటీఆర్ చేసిన వ్యాఖ్యలు సోషల్ మీడియాలో వైరల్ గా మారాయి. ఏదైనా సాధించాలన్న తపన ఉన్న నాయకుడు చంద్రబాబు అని కేటీఆర్ తాజాగా ప్రశంసించిన వైనంపై సోషల్ మీడియాలో జోరుగా చర్చ జరుగుతోంది.
కొద్ది నెలల క్రితం చంద్రబాబును అరెస్టు చేస్తే హైదరాబాదులో నిరసనలు చేయడం ఏంటి అని కేటీఆర్ అన్న మాటలను ఈ సందర్భంగా నెటిజనులు కోట్ చేస్తున్నారు. అధికారంలో ఉన్నప్పుడు ఒక మాట, ప్రతిపక్షంలో ఉన్నప్పుడు ఒక మాట మాట్లాడడం కేటీఆర్ కే చెల్లిందని నెటిజన్లు విమర్శలు గుప్పిస్తున్నారు. ఏపీ సీఎం చంద్రబాబు నేతృత్వంలో హైదరాబాద్ ను అమరావతి బీట్ చేస్తుందా అన్న ప్రశ్నకు కేటీఆర్ ఆసక్తికరంగా సమాధానం ఇచ్చారు.
సాధించాలన్న తపన ఉన్న నాయకుడు చంద్రబాబు అని, కానీ హైదరాబాద్ సొంతంగానే అభివృద్ధి చెందిందని కేటీఆర్ మరోసారి చంద్రబాబుపై అక్కసు వెళ్లగక్కారు. ఐటీ రంగంలో కూడా బెంగళూరును హైదరాబాద్ దాటేసిందని చెప్పుకొచ్చారు. ఏదేమైనా చంద్రబాబు గురించి కొద్ది నెలల వ్యవధిలోనే ఈ రకంగా రెండు నాలుకల ధోరణితో మాట్లాడిన కేటీఆర్ పై కొందరు ట్రోలింగ్ చేస్తున్నారు. ఏ ఎండకు ఆ గొడుగు పట్టినట్లుగా కేటీఆర్ మాట తీరు ఉందని అంటున్నారు.
