మంత్రి కొడాలి నాని, టీడీపీ నేత వంగవీటి రాధా…ఈ రెండు పేర్లు కలిస్తేనే కచ్చితంగా ఏదో హాట్ టాపిక్ ఉంటుంది. ఇక, ఈ ఇద్దరూ ఒకే ఫ్రేమ్ లో కనిపిస్తే…తప్పకుండా ఏదో సీరియస్ మ్యాటర్ అయి ఉంటుంది. ఏపీ రాజకీయాల్లో వైరిపార్టీల్లో ఉంటూ కూడా తమ స్నేహ బంధాన్ని కొనసాగిస్తున్న ఈ ఇద్దరు నేతలు గతంలోనూ పలు మార్లు ముచ్చటించుకున్న సందర్భాలు చర్చనీయాంశమయ్యాయి. ఈ నేపథ్యంలోనే తాజాగా ఈ ఇద్దరు దోస్తులు కలిసి ఆటోలో కూర్చని చాయ్ పే చర్చ చేస్తున్న ఫొటోలు ఇపుడు సోషల్ మీడియాలో వైరల్ అయ్యాయి.
వంగవీటి రాధాను వైసీపీలోకి తెచ్చేందుకు కొడాలి నాని చాలాకాలంగా ప్రయత్నాలు చేస్తున్నారన్న టాక్ ఉంది. అయితే, మిత్రడు కొడాలి నాని ఇస్తున్న ఆఫర్ ను రాధ సుతిమెత్తగా తిరస్కరిస్తున్నారు. కొద్ది రోజుల క్రితం రాధా మర్డర్ కు రెక్కీ ఆరోపణల నేపథ్యంలో తాను టీడీపీని వీడడం లేదని రాధా క్లారిటీ కూడా ఇచ్చారు. ఈ నేపథ్యంలో తాజాగా మరోసారి రాధా, కొడాలి నానిలు భేటీ కావడం చర్చనీయాంశమైంది.
గుడివాడలో మునిసిపల్ మాజీ వైస్ చైర్మన్ అడపా వెంకట రమణ (బాబ్జి) అంతిమయాత్రలో రాధా, నానిలు పాల్గొన్నారు. బాబ్జి కుటుంబ సభ్యులను పరామర్శించిన తర్వాత ఆ ఇద్దరు మిత్రులు ఓ ఆటోలో కూర్చుని చాయ్ తాగుతూ కనిపించారు. దీంతో, ఈ సందర్భంగా వారిద్దరూ ఏం మాట్లాడుకున్నారనేది హాట్ టాపిక్ గా మారింది. త్వరలో ఎన్నికలు వచ్చే సూచనలున్న నేపథ్యంలో రాధాను మరోసారి పార్టీలోకి నాని ఆహ్వానించి ఉంటారన్న ప్రచారం జరుగుతోంది.
ఇక, నానితో రాధా ఉన్నంత సన్నిహితంగా వేరే టీడీపీ నేతలెవరితో ఉండరన్న ప్రచారం నేపథ్యంతో పాటు..టీడీపీ కార్యక్రమాలకు రాధా చాలాకాలంగా దూరంగా ఉంటున్నారు. దీంతో, రాధా రేపో మాపో పార్టీ మారడం ఖాయమని, తన మిత్రుడి సలహా పాటించి వైసీపీ తీర్థం పుచ్చుకోవడం గ్యారెంటీ అని టాక్ వస్తోంది. ఏది ఏమైనా…ఈ ఇద్దరు మిత్రులు….దోస్తీ….అంటూ చాయ్ పె చర్చ జరిపిన ఫొటోలో ో సోషల్ మీడియాలో వైరల్ అయ్యాయి.
